千元性價比+規格最強 8 吋平板? 小米平板 2 版主開箱一手速測

Lawrence 2015-12-31 18:27 | 小米
係 11 月尾的時候版主就同大家為紅米 Note 3 做左個開箱分享,其實同期小米亦都推出左小米平板,以最平 16GB 版本定價一千人仔有找作為賣點。雖然幾時會係香港推出實在好難講,但係千元價位平板一向都幾有市場,相信應該唔少朋友都已經積極考慮入唔入手好。其實,係推出之後無耐,版主都有機會試玩呢部係外型上同前代大有分別的平板,一齊睇下值唔值得入手啦!

//timgm.eprice.com.hk/hk/pad/img/2015-12/31/68193/lawrencelaw_1_4635_39d818cd00a77b5a8f62eed4dff8ea48.jpg

關於小米平板 2,石先生早前都做過影片介紹(實際上版主試玩同石先生介紹的都係同一部機), 都可以大約知道係規格上,新一代小米平板 2 跟上一代相比,其實無明顯大分別。係屏幕尺吋上都係用返 7.9 吋 2,048 x 1,536 解像度。處理器會係小米平板一個明顯不同的地方,因為小米未有繼續選擇 NVIDIA Tegra 處理器,而係改用左 Intel 的 X5-Z8500 處理器,當中主要原因相信係在 Intel 支持下小米平板 2 可以壓低賣價吧?呢個處理器其實其他大陸平板都用過,好似係之前版主都試過我台電 X98 Pro 。賣點在於處理器支援 64bit 同埋用上 14nm 製程。可惜小米平板 2 都只係得 2GB RAM 。

另一樣係硬件規格上可以再提多少少的就係第一代小米平板係支援最大 128GB MicroSD 卡,但來到第二代就無呢項功能,所以係入手時大家可以先衡量下選擇 16GB 版本已經足夠還是選 64GB 會比較好了。係電池方面,小米平板 2 因為做得更薄,所以電量只有 6190mAh ,比起上代的 6700mAh 少。

//timgm.eprice.com.hk/hk/pad/img/2015-12/31/68193/lawrencelaw_3_4635_c5d561ca8a182c980a4c4bd7809d138c.jpg
▲ 版主試玩的是 16GB 版本小米平板 2 ,包裝盒同紅米 Note 3 一樣改成以白色做主色。

//timgm.eprice.com.hk/hk/pad/img/2015-12/31/68193/lawrencelaw_3_4635_5a23e6de1d525e84958a04b94790644b.jpg
▲嚴格而言小米平板 2 係 7.9 吋而非 8 吋平板,個人覺得呢個尺吋左右的平板算係岩岩好,太大差不多 10 吋就不易攜帶, 7 吋又可能太細。


造工比大陸千元價位平板更好,是重點?

接下來會有小小 Off Topic ,但個人覺得同小米平板 2 關係都幾密切。今年對 android 平板來說發展實在算唔上好,甚至可以話到達一個樽頸位,就香港市場而言亦都相當艱難。不知大家有沒有留意到,以往用平價以及機海戰術作主導的 Asus 係 2015 下半年係完全沒有推出平板產品的,例如係在台灣市場推出的 ZenPad S 8.0 , Asus 就沒有帶來香港,據聞原因之一就係因為平板未有支援 4G ,廠方相信難以係香港發圍。

而以上情況就帶來左一個問題了,對於預算有限,不願花大錢入手新平板的用家來講,今年真係無乜千元價位好選擇。如果選千元價位的大陸平板,規格可能會唔錯但造工同大牌子平板相比都有一段距離。如果揀返舊代大牌子平板的話硬件又唔容易滿足到大家的要求。所以版主個人看法就係小米平板 2 的出現,某程度上可以話係填補左現時千元價位平板「真空」呢個問題。

小米平板 2 雖然只係跟返上一代用 7.9 吋芒 2K 解像度屏幕,但係因為改用左金屬機身,感覺上同上代比可以話係「高檔」左少少。而小米作為大陸一線企業,在小米平板 2 的外型同造工方面都可以睇到係處理得比一般大陸平板好的,最少看起來小米平板 2 的外型係一個設計工整的產品。不過咁,改用左金屬機身之後,小米平板 2 的外型又有另一個未必係人人接受到的地方,就係同 iPad Mini 實在太似樣了。個人覺得比起一般大陸平板感覺「更 iPad Mini」,呢個算唔算得上係缺點就要看大家的接受程度啦。

//timgm.eprice.com.hk/hk/pad/img/2015-12/31/68193/lawrencelaw_3_4635_7392bb1e6911b98f34c0177b2412a94e.jpg
▲ 機背上,小米平板 2 用左金屬材質,雙喇叭置於機底,整體感覺⋯⋯係咪真係有點 iPad Mini 味?

//timgm.eprice.com.hk/hk/pad/img/2015-12/31/68193/lawrencelaw_3_4635_bf37383f1782ea17a9ac1ddd116335da.jpg
▲ 主鏡頭解像度係 800 萬像度,沒有補光燈,同上代一樣。

//timgm.eprice.com.hk/hk/pad/img/2015-12/31/68193/lawrencelaw_3_4635_a844d03546d251e89d85285137172fdf.jpg
▲ 機面底部都有小米一直用開的三個熱感式按鍵。

//timgm.eprice.com.hk/hk/pad/img/2015-12/31/68193/lawrencelaw_3_4635_cf672d5f3f01ab34c5f5df16d4bccd80.jpg
▲個人覺得要分別小米平板 2 同 iPad Mini 的分別就靠個「mi」字樣了(笑)。另外,小米平板 2 同上代相比其中一個明顯變代就係改用左 USB Type C 。

效能勝過 S808 但不及 S810

效能可能都係大家對小米平板相當關心的一環,因為小米平板 2 其中一個重點就係由 Tegra 改為 Intel 處理器,而大家都知 Intel 處理器用在 Android 上效能難免會打個折。雖然係咁,但版主用安兔兔 5.7 版以及新的 6.0 版跑分時,成績最少都叫做中上,比起 S808 的 LG G4 好,但係不及用上 S810 的 HTC One M9 。另外,因為係小米平板 2 推出時,外媒 fonearena 都提過在 Geekbench 上,小米平板第一代得分比第二代還要高,版主當然都有試一次啦!

//timgm.eprice.com.hk/hk/pad/img/2015-12/31/68193/lawrencelaw_3_4635_564cc2eb3df889212eef73971bfac200.jpg
▲係只有 16GB 內置容量又不能插卡的情況下,小米平板 2 本身「大唔大食」自然叫人擔心,從安兔兔資料可見本身仲有 10GB 可用。而係 6.0 版本中,小米平板 2 有 73425 分。

//timgm.eprice.com.hk/hk/pad/img/2015-12/31/68193/lawrencelaw_3_4635_4bbe3e46f72c9f4d67917b7531186ad4.jpg
▲係安免免 5.7.3 中,小米平板 2 都上到五萬,但係同 HTC One M9 等 S810 處理器產品相比就有啲差距。

//timgm.eprice.com.hk/hk/pad/img/2015-12/31/68193/lawrencelaw_3_4635_e5308c1603458f9d9a84ec99ebc2d63e.jpg
▲ 有網友提到想知小米平板 2 在 BaseMark 2.0 Taiji 上有沒有 60fps ,看來沒有呢。

//timgm.eprice.com.hk/hk/pad/img/2015-12/31/68193/lawrencelaw_4_4635_812a460f0e48778464168471b05696ce.png //timgm.eprice.com.hk/hk/pad/img/2015-12/31/68193/lawrencelaw_4_4635_65568851f8aaed4a2501db80f2872438.jpg
▲ 之前有新聞指出,係 Geekbench 測試中,小米平板 2 「新不如舊」,版主沒有小米平板第一代,只好以 Geekbench 資料庫中小米平板的成績跟試玩的小米平板 2 作比較。實際上⋯⋯第二代又真係低分啲。

小結:可能係一部「平無特別」的平板,但看來卻是市場所需要的

之前石先生係試玩小米平板 2 的時候,就用上「平實無特別的 Android 平板 」來形容。呢一點版主個人好大程度上係同意的,因為係試用的期間對呢部平板真係無乜特別感覺,也找不到好值得講的特點。(見到成篇對平板試用著墨不多就知啦!)如果正面咁講,版主會話小米平板 2 係一部「四平八穩」的平板,造工對得住定價,規格不會叫人失望,用落感覺都不會很差,最大問題都係小米拿掉了支援 SD 卡功能可以話「半逼」大家選 64GB 版本。

不過,現在看來,一部「普普通通」,即係造工規格不差而價錢最緊要平的 Android 平板才是市場所需要的。當小米平板 2 到港後,不少細鋪店主已經話小米平板 2 出奇地賣得,到左聖誕期間更是一機難求,價錢再炒高。可以見到,千元價位平板而家仍然「渴市」,小米如果能把握機會盡快在港正式推出小米平板 2 ,還唔定仲好賣過紅米 Note 2 呢!

在文章發佈時,小米平板 2 在香港發售日期未定,按此看平板規格及最新賣價

最新新聞