話說今日行過大埔分店嘅小米之家，就入去走轉睇下有乜特別，咁啱行到去 Xiaomi Book S 嘅位置，我就停咗落嚟，玩下部機，畢竟部機出咗咁耐，其實我無乜上過手玩過。而呢個時候，有店員就走埋嚟，同我吹下水，咁啱講到呢部 Xiaomi Book S 做緊分店快閃優惠，只要申請 Atome 戶口，並綁定信用卡，就可以 $4999 優惠價錢，入手 Xiaomi Book S 連 Keyboard！你可以當係「暗價」，因為佢真係無寫出嚟！
其實，如果唔係呢個快閃優惠，呢部 Xiaomi Book S 淨機喺小米之家嘅賣價，都只係由 $5499 減至 $5099，連埋 Keyboard 組合價要 $5599；當然出面有地方仲平，豐澤而家都只係賣緊 $4599，當然一樣唔包 Keyboard，但 Keyboard 買都係 $829，咁加起上來係比小米之家無快閃優惠嗰陣再便宜一點。不過而家 $4999 平板連埋 Keyboard，成套買到，你又會考慮嗎？
Xiaomi Book S 規格資料
規格方面，Xiaomi Book S 採用咗 12.4 吋 2.5K 觸控大屏幕，支持 100% sRGB 色域，配備 Qualcomm Snapdragon 8cx Gen 2 處理器，唔好以為係 S8 Gen 1 嘅新一代，呢粒 U 其實喺 2020 年已經推出，舊 U 嚟，而家已經出到第三代，係一個 Qualcomm 專為 Windows 機而設嘅處理器，內置 8GB RAM 以及 256GB ROM，續航時間長達 14 小時，並支持 65W 快速充電。除咗支持鍵盤，仲支持手寫筆，都係要另外購買，並且會運行 Windows 11 (S 模式)，不過其實 Microsoft 都有選項讓用家永久退出 S 模式，詳情可按這裡進入 Microsoft 網頁了解更多。
