$599 有交易，紅米入門平板超抵價?
呢部 Redmi Pad SE 8.7 Wi-Fi版（4+64GB）建議零售價為 $799 左右。而家 csl 網店將價錢拉到落 $599，確實幾有驚喜。比起上次介紹、賣 $999兼有 4G 通話功能嘅 BNCF BPad Mini，呢部紅米平足足 $400，不過就冇咗流動網絡功能，純粹靠 Wi-Fi 上網。
輕巧長氣，睇片一流
講到規格，呢部 Pad SE 8.7 走嘅係實用路線。佢用咗一塊 8.7 吋嘅 LCD 屏幕，支持 90Hz 更新率，碌網頁同睇片會覺得順暢啲。不過老實講，佢嘅解像度係 1340 x 800，像素密度冇咁高，畫面細緻度就唔好同貴價平板比較啦，但以呢個價位來講，算係合格有餘。性能方面，佢內置 MediaTek Helio G85 處理器、4GB RAM 同 64GB 儲存空間，並且可以透過 MicroSD 卡擴充最多 2TB，唔怕唔夠位擺劇集，有 6650mAh，續航力尚算 OK。影相就好基本，前後鏡頭分別係 500 萬同 800 萬像素，用來視像通話夠用。機身重約 373g，拎上手都算輕便。