Xiaomi Pad 8 Pro 開箱看外觀
今次 Xiaomi Pad 8 Pro 賣街版一共有四個選擇，分別係灰色（柔光屏幕版）、灰色、藍色以及綠色。而版主今次上手試玩嘅，就係非常搶眼嘅綠色版本。機身採用一體成型金屬材質，非常有質感。最正嘅係，雖然佢內置超大電池，但厚度只有 5.75mm，重量亦都壓到落 485g，長時間攞上手煲劇或者外攜做嘢都唔會覺得墜手。
屏幕絕對係今代一大賣點。綠色版本配備咗一塊 11.2 吋 3.2K 解像度（3200 x 2136）嘅 LCD 大芒，支援 144Hz 自適應更新率同埋 800 nits 峰值亮度。亮面屏幕令到色彩表現非常鮮艷亮麗，睇戲打機視覺效果一流。順帶一提，如果你對防反光有極高要求，或者成日用觸控筆寫字畫畫，小米亦都有提供採用 AG 納米紋理工藝嘅灰色「柔光屏幕版」畀大家揀。
▲ Xiaomi Pad 8 Pro 綠色版本，一體成型金屬機身造工扎實，非常「靚仔」。
▲ 11.2 吋 3.2K 屏幕畫質細緻，色彩鮮艷，娛樂體驗極佳。
▲ 機身厚度只有 5.75mm，帶出街非常輕便。
▲ 底部配有 USB Type-C 接口，支援 67W 極速快充。
性能測試：Snapdragon 8 Elite 效能跑分即睇
性能方面，Xiaomi Pad 8 Pro 搭載咗最新嘅 Qualcomm Snapdragon 8 Elite (3nm 製程) 流動平台。平板配備旗艦級手機 CPU，無論係應付複雜嘅多工任務，定係玩高畫質嘅 3D 遊戲，都係游刃有餘。循例都要幫大家報個跑分，根據測試數據，安兔兔 V11 跑分輕鬆突破 300 萬分。雖然跑分唔代表一切，但呢個旗艦級分數已經保證咗佢有絕對流暢嘅操作體驗。
相機與影音
平板相機通常都係用嚟掃 QR Code 或者視像會議，但 Xiaomi Pad 8 Pro 嘅鏡頭配置都好足料。佢配備咗 5000 萬像素主鏡頭同埋高達 3200 萬像素嘅前置鏡頭，平時開 Video Call 畫質絕對清晰。睇戲聽歌方面，佢配備支援 Dolby Atmos 嘅四揚聲器，仲支援 200% 音量提升功能。版主試播 YouTube 片段，啲聲真係夠大夠震撼，立體感好強。
HyperOS 3 系統與專屬配件
Xiaomi Pad 8 Pro 預載咗最新嘅 Xiaomi HyperOS 3 系統，更加加入咗唔少 PC 級功能，例如直覺化佈局嘅 PC 級瀏覽器同埋 WPS Office 整合。透過 Xiaomi Smart Hub，仲可以同小米手機無縫連接，互傳檔案或者共享剪貼簿。講到做嘢，一定要配埋佢啲專屬配件：
懸浮鍵盤：支援 0-124° 自由懸停，磁吸連接唔需要對準接點，打字手感拍得住一般手提電腦。
Xiaomi 焦點觸控筆 Pro：升級到 16384 級壓感，延遲低至 0.8ms，仲支援雙指捏筆尖觸發額外功能（例如截圖或批注），寫字畫畫嘅還原度同靈敏度都極高。
續航力方面，平板內置 9200mAh 特大電池，帶出街應付一日嘅文書處理同埋串流播片絕對夠做。
