MEEBOOK M6 簡單介紹
首先講下呢個 MEEBOOK 品牌嘅背景先，其實佢同我以前寫過嘅 Likebook 有啲淵源，因為其實佢係 2021 年由 Likebook 原班人馬打造嘅另一個電子書品牌，改咗個名叫 MEEBOOK，而今次同大家報價嘅呢部 MEEBOOK M6，就係佢 2023 年 (即係今年) 推出嘅新機，係一部擁有 6 吋芒嘅 E Ink 電子書，解像度為 1448 x 1072，而對於中意臨訓之前熄哂燈都仲睇電子書嘅版主嚟講，呢部電子書具有可調節雙色溫閱讀前燈，我會覺得幾適合我用。另外有一個特點，我都唔知電子書嚟講算唔算係特點，但我覺得有好過無，就係佢係行 Android 系統，有 Google Play 商店，可以畀我下載平時睇開嘅電子書 App，因為以前接觸過好似 Kindle 嗰類電子書，畀到我真係唔多識用，但有 Google Play 就唔同啲！呢部 MEEBOOK M6 仲配備咗 Cortex-A55 1.8GHz 四核心處理器，內置 3GB RAM 以及 32GB ROM，支援 1TB microSD 擴充，電池容量為 2200mAh。
MEEBOOK M6 香港行貨賣價資訊
呢部電子書日前在香港開賣，有行貨一年保用，至於售價方面，官方零售價為 $1398，不過而家優惠價 $1099，送價值 $98 原裝機套。呢個價錢我覺得相對容易令人接受，唔知網友又點睇呢？報價查詢：Richcat Mart 發達貓百貨 (前奇數碼)