唔止電競手機 而家連平板、耳機都有
講起 Black Shark，大家第一印象可能仍然係電競手機。始終黑鯊早年最出名，就係專門推出針對打機玩家的手機，之後再慢慢加入散熱背夾、遊戲耳機等周邊。不過而家黑鯊的產品線其實已經闊咗好多。根據今次公布的資料，品牌近期已經有 Black Shark Pad 7、Black Shark Pad SE、Rokas 系列耳機、T11 以及 Buds 6 ANC 等產品，即係除咗打機周邊之外，平板、TWS 耳機都已經成為主力產品。而隨住 Qool 再次成為港澳總代理，之後 Black Shark 產品亦會進一步擴展香港同澳門的零售網絡。
豐澤、百老滙、衛訊都有得買
今次一個比較實際的重點，就係銷售渠道。官方公布，Black Shark 產品之後會陸續透過：Fortress 豐澤、Broadway 百老滙、衛訊 Wilson、中原電器、張毛記 CMK、澳門 DCL，以及其他零售商發售。對香港用家來講其實都幾重要，因為以前部分電競品牌或者內地品牌產品，最大問題未必係產品本身，而係香港究竟有冇正式代理、保養去邊、壞機要點處理。
今次重新有港澳總代理，至少日後買 Black Shark 產品時，銷售渠道以及售後處理會清晰返好多。
Black Shark Pad 7 4G：11 吋 90Hz、售 $1,499
今次公布的產品之中，版主覺得比較值得留意的，首先係 Black Shark Pad 7 4G。呢部平板配備 11 吋 FHD 90Hz 顯示屏，同時獲得 Widevine L1 認證，所以可以支援全高清串流影片播放。內置 7700mAh 電池，支援 18W 快充，記憶體組合就係 6GB RAM + 128GB ROM，另外仲支援 microSD 記憶卡擴充最高 1TB。香港建議零售價只係 HK$1,499，有灰色以及藍色選擇。如果純粹想搵一部唔太貴、可以上網、睇片，間中打下機的 4G 平板，呢個價位其實幾有競爭力。
再平少少有 Pad SE 4G：$1,299
如果預算再低啲，就有 Black Shark Pad SE 4G。佢採用 10.1 吋 HD 60Hz 屏幕，同樣有 Widevine L1 認證，容量為 4GB + 128GB，並支援 microSD 擴充最高 1TB。香港售價為 HK$1,299，提供黑色以及藍色。不過呢部同 Pad 7 最大差別就真係幾明顯，尤其屏幕由 FHD 90Hz 降到 HD 60Hz。
所以如果兩部只係相差 $200，版主個人反而會比較傾向直接加多少少上 Pad 7，始終屏幕係你每日都會望住的東西。
Rokas 5 玩雙模連線 售 $599
耳機方面就有 Black Shark Rokas 5。外形繼續走黑鯊一貫比較誇張的電競風格，採用重金屬賽博機甲設計，支援 藍牙 + 2.4GHz 雙模連線，而 2.4GHz 模式就透過 USB-C 接收器使用。對打機玩家來講，最大賣點自然就係低延遲。另外亦支援藍牙 6.0，可以即時配對以及對應多款裝置。Rokas 5 香港建議零售價為 HK$599，有黑色以及白色。
Buds 6 ANC：$399 有 45dB ANC
如果唔需要咁強的電競造型，另一款比較正常的 TWS 耳機就有 Black Shark Buds 6 ANC。售價只係 HK$399，但規格就有 最高 45dB 混合式主動降噪、通透模式以及 45ms 低延遲。另外官方仲標示支援 145 種語言的即時 AI 翻譯，有黑色及白色選擇。以 $399 呢個價位來講，如果 ANC 表現做到預期，規格其實幾進取。
其他耳機最低 $399 起
除此之外，今次公布的產品仲有：Black Shark Rokas 3，採用比較特別的指尖陀螺造型充電盒，主打低遊戲延遲，總續航時間最長 24 小時，售價 HK$499。Black Shark T11 採用滑蓋式設計，配合 RGB 燈效以及 13mm 動圈單元，香港售價 HK$399。換句話講，黑鯊今次重返香港之後，似乎唔再只係想靠一部電競手機打天下，而係由平板、耳機到遊戲周邊一次過鋪開。