[SEP]
話說最近 HSBC 嘅 PayMe 推出咗「群組利是」功能，即係派錢（利是）俾你朋友。PayMe 「群組利是」其實有好多玩法。當中無指定「開運利是」相當好玩！我哋最近喺 Clubhouse 節目「輕鬆講科技」裡面跟現場 Live 收聽、收睇觀眾玩過，大家都大叫好玩，仲要我哋加場去玩！
PayMe 最好玩
近日收到唔少資訊，銀行、電子銀包都推出電子利是功能，但講到好玩，一定係 HSBC 嘅 PayMe。PayMe 市佔相當高，雖然唔多用嚟買嘢，但朋友間過數、夾錢食飯十有九用 PayMe。而 PayMe 戶口，無一百都幾十蚊，用嚟派電子利是，是最方便呀。今年 2022 年 PayMe 向微信錢包學習，推出派利是遊戲。其實，今次 PayMe 「群組利是」兩個玩法。只要更新 PayMe 手機 App，大家咪見到最底部中間位置咪有個 PayMe logo 嘅，撳入去。會見到除咗有「向商店付款」、「掃描」、「向朋友過數」、「收款」之外，而家仲多咗個叫「派群組利是」嘅功能，就係呢個。有「指定收款人」同埋「無指定收款人」兩個選項，呢度應該唔難明，簡單啲嚟講，「指定收款人」就係自私派，你揀你想派畀咩嘢人，然後一次過咁派錢畀佢哋；而「無指定收款人」呢，就好玩好多，即係例如我哋 Clubhouse 節目入面，或者 Telegram 群組，只要扔條 Link 出嚟，大家就可以搶。我同你，可以唔係 PayMe friend，但你一擁有條 Link，你撳入去都有機會收到錢 (當然大家都要有用 PayMe 啦)。
開運利是唔知送、收幾多錢
「無指定收款人」又有「定額利是」同埋「開運利是」兩種玩法，而「開運利是」就係最好玩之處。你可以 set 你要派幾多封，要派出嘅利是總額係幾多，然後收錢果個就隨機收到金額，最低可能會收到 $0.01，純靠運氣。例如我要派 $200嘅「開運利是」，set 派 30 封出去，可能有機會 A 就收到 $100，B 就收 $0.01，都唔出奇，就同抽獎玩法一樣。
▲ 以當日試玩為，拎咗 HK$200 玩 「開運利是」，最幸運嗰位聽眾，一次攞咗 $13.8。當然有人係一蚊都無啦，睇你嗰日有無運咁囉。
喺 Clubhouse 節目「輕鬆講科技」裡面，我哋拎咗 HK$200 玩 「開運利是」，派畀大家，志在同大家玩下，30 個名額，睇下面我哋 attach 咗當日房間嘅內容 (後半部份）大家就會聽到、睇到當日玩得大家有幾開心！
▲ 上面係 Clubhouse 節目「輕鬆講科技」嘅免費 Web 版重温，今集關於 PayMe 試玩，喺節目後半，之前仲有教你用 Opera 全新元宇宙 Web Browser。如果想有更好體驗，歡迎網友下載 Clubhouse 呢個 App，並點入呢度收聽重温。