有去過北海道旅行嘅網友，可能都會見過「熊出沒注意」嘅紀念品，的而且確北海道係黑熊棲息地。假如黑熊出現喺人類居住的地方，一般都會被視作威脅，市政府就會要求當地獵人組織出動捕捉，甚至將黑熊獵殺。不過上週四黑熊喺北海道島牧村出沒，但獵人卻拒絕出動，發生咩事？跳轉話你知。
[SEP]
目擊者表示黑熊有 2 米長，喺島牧村公路出現之後，又有市民見到黑熊喺港口停泊嘅漁船搵食。正當居民期待獵人出現，但只有普通警察前往調查。原來當地市政府同獵人組織有錢銀拗撬，獵人每次出動會收取 3 萬日圓，不過市政府一直拖數，至今已經累積咗 1,156 萬日圓，所以獵人拒絕再開工。
島牧村政府就話佢哋並非走數，只係想釐清獵人正常巡邏，同因應緊急情況出動嘅收費，話要坐低傾清楚同解決。有獵人就話佢哋搵命博，但市政府就坐喺度，仲話佢哋睇錢比人命更重要。咪以為黑熊係熊 Bear Bear，其實佢哋一啲都唔友善，兩年前喺秋田縣就有一位長者俾黑熊食咗落肚。
資料來源：soranews