開箱一覽
其實呢部 Galaxy Book S 係一部非常創新的筆電，點解咁講呢？ 因為硬件上脫離一般筆電的玩法，從處理器、儲存裝置、甚至記憶體等等，改用流動通信硬件的方案。 大家還記得之前牽起過小潮流的高通處理器 Windows 筆電嗎？ 但始終 ARM 版的 Windows 未成熟，大家又想要造工好、硬件夠用又省電的移動文書機。呢部 Book S 正正係回應市場的訴求而生，稍後逐一話你知點解！
▲ 香港三星並沒有推出高通處理器 LTE 版，畢竟 ARM 配 Windows 依然有各種小問題如軟件兼容度、程式轉換效能等，攞黎開工真係玩自己；行貨 Book S 只有 Intel 處理器 WiFi 版，行緊正常 x86 Windows 所以乜事都無，正！
▲ 我手上的型號係真 Win 10 Home 版（另有 Pro 版發售），各種規格盒身上一目瞭然。
▲ 跟機配件如圖，可以話係應有盡有，起碼新機翻黎一打開個盒你唔需要額外買配件就可以如常使用。 你睇下蘋果筆電先啦，三星算係佛心喇 ~
▲ 跟機比埋個原裝 USB-C / HDMI 的影像輸出線；
▲ 亦比埋個 USB-C / USB-A 轉頭，等你插手指、接手機都可以立刻用到。
▲ 呢部 Book S 係透過 USB-C 線材充電；條野好似我（講緊身高）咁長，拍埋屋企度門目測有約 2 米長。
▲ 快充 25W USB-C 火牛支持多種固定電壓、甚至係動態電壓輸出模式！ 最重要係望到火牛產地係越南，當場安心晒。
機身外觀
三星 Galaxy Book S 上手感覺真係好輕巧，13.3 吋屏幕 + 觸控屏幕加持下標重竟然只有 950 克，屬於黐線等級，而且厚度亦只有 11.8 毫米。對比同樣 13.3 吋屏幕但無觸控的 Macbook Air 筆電 1290 克 配 16.1 毫米，毫無疑問完全係規格上秒殺晒！ 哪怕係再細一級的舊款 12 吋 Macbook，重量 920 克配 13.1 毫米厚度，依然係 Book S 優勝！
▲ 官方描述的水星灰，冰冷金屬質感非常靚，但當然缺點係吸油吸指紋啦。
▲ 雕刻銀色光面的「SAMSUNG」標誌，保持簡約的外觀風格。
▲ 機身底部非常乾淨，因為採用無風扇散熱方案，所以無窿可尋； 四個防滑膠「前平尾凸」，貼心地造出高低差，筆電放平檯面時有輕微的傾斜度，有助提高鍵盤體驗外，留有更多空氣經過底部幫助散熱。
▲ 底部有一個塑膠卡槽，是 microSD 讀卡器。最高支持 1TB 的擴充容量。
▲ 轉軸並沒有任何出風口設計，阻尼調整順暢而穩定，全段的開合感覺都好均勻自然。
▲ 機身前沿凹入式揭屏設計，重點係平放檯面時係可以單手、兩隻手指就打開佢，方便習慣單手操作的用戶；左右側分別都有 AKG 喇叭。
▲ 機身左側有 3.5mm 耳機孔、一個 USB-C 接口。
▲ 右側仲簡單，得一個 USB-C 接口。
▲ 機身真係黐線地薄，唔好唔記得佢係有觸控屏幕設計，所以做到咁薄係好難，而且厚度數值上亦完全秒殺自稱「Air」咁稀薄的筆電；真係要講句三星 Good Job 喇！
內部佈局
▲ 非常工整清晰的佈局，一眼睇晒大面積鍵盤、大面積觸控板。
▲ 機身太薄的緣故，按鍵觸感因為鍵程短，反饋感自然比較弱，但已經拋離蘋果筆電鍵盤；
▲ 呢部 Book S 其實係有背光鍵盤，但個亮度真係好唔亮，倒不如話係螢光鍵盤。。。無燈房裡面開到最光都係上面呢種亮度（圖片儘量還原肉眼所見亮度）。
▲ 按鍵無明顯段落感，直上直落又輕巧，非常適合女士輕輕力咁打字。
▲ 大面積觸控板亦相當順滑，摸上手有絲質感覺，亦自然支持 Windows 10 的多指手勢操控。
▲ 電源鍵整合指紋識別器，開機解鎖確實係方便好多。
▲ 左右各一個完整大小的 Shift 和 Ctrl 按鍵，而 Home、Pg UP、Pg Dn、End 鍵整合成為 Fn 組合一部分。
▲ 機身兩個 USB-C 都可以充電，但只係得右側有充電指示燈。
▲ 一塊支持 10 點觸控的 13.3 吋 FHD 屏幕，一般亮度達 300nit，開啟 Fn + O 戶外模式下，亮度可以立刻提升到 600nit。 而且本 YK 私下用相機快門測試，並無發現屏幕有任何低頻閃的情況，正！
▲ 屏幕亦屬於三邊窄框設計，頂部有一個 100 萬像素鏡頭，同客開會個鏡頭梗係睇唔清最好啦，好似係！
▲ 依稀記得某果粉朋友收機當日係落大雨咁狗衝出去買 DOCK 用果下，翻黎成身濕過隻 DOG，真係慘。
▲ 重點係三星呢個轉頭設計好人性化，記得要如圖所示的上下方向插入，咁你就會發現轉頭剛剛好貼住檯面，唔會出現唔覺意壓爛插頭，避免整爆 PORT 的慘劇發生。
各項性能測試
規格一覽
▲ 三星 Book S 採用一款非常特別的 i5-L16G7 處理器，採用 Foveros 3D 立體封裝技術整合 22nm 和 10nm 雙制程的玩法，擁有 4MB 快取記憶體；「一大四小」五核心的格局，係咪好熟悉呢？
▲ 今次 Intel 推出呢款低功耗處理器，又無超線程的設計，就咁睇其實係模仿緊 ARM 處理器「高效能拖低功耗」的特色。
▲ 整合 Inetl UHD Graphics 圖像處理單元。
開機速度
▲ 開機需要 20 秒才能完成系統啟動，再多 31 秒載入其他應用進入桌面；速度不算快，但不到一分鐘的時間還算可以接受。
綜合性能
▲ 在 Novabench 綜合性能測試中，呢部 Book S 獲得 1080 分。
SSD 測試
▲ 你會發現沒有辦法查看到詳細資訊，因為 Book S 採用最新的 512GB eUFS 儲存，其實類似手機的快閃儲存裝置，並沒有採用標準 SSD 規格；壞處係速度、壽命問題未獲得驗證，但好處係體積極小，機身做到咁輕薄功不可沒。
▲ 在連續讀寫結果中，Book S 獲得 1094mB/s 和 416mB/s 的成績；而多工隨機讀寫 （4K Q32T1）卻有 272mB/s 和 222mB/s 的速度，結果不過不失，性能與主流 SSD 相距不大。
CPU 處理器性能
▲ 在 CINEBENCH R20 版測試中，Book S 呢個新奇的「親子 U」 i5-L16G7 多核心獲得 569 分；而在單核心方面得分亦只有 187 分；MR Ratio 係合理的 3.04 倍，皆因你係「一大四細」嘛；結果所見，效能相當入門。
GPU 圖像處理性能
▲ 核顯 UHD 在 BasemarkGPU 標準測試的 4K Vulkan 1.0 測試中得到 359 分；比較意外係效能竟然無被 UHD 620 拋離得太遠。
電力續航測試
▲ 官方聲稱達 42Wh 電量提供長達 17 小時影片播放續航力；但檢測的結果顯示只有約 40Wh 左右。
▲ 利用 Imtec Battery Mark 軟件，在飛行模式下將處理器 Chur 到全開狀態，屏幕亮度調整至最暗進行測試，跑出 7 小時 44 分的極限續航結果，說明用戶普通用機起碼有 7 小時多的可使用時間（當然睇埋你到底玩乜啦）。
▲ 機身放係 WiFi 隔離唔超過 1 米距離，利用 Chrome 做播放指定的 720p 解析度 Youtube 影片；開啟省電模式，屏幕調整到最暗下播放影片，觀測一小時播放後的耗電量。
▲ 過了 60 分鐘後只使用了 7% 電量；由此推算，充滿電係可以睇到 14 小時 AV 無難度！
關於這款機用上其他筆電比較少用上的 Intel Core i5-L16G7。這粒 Intel 全新 CPU，在香港來講，只有三星 Galaxy Book S 用上，到底呢粒 CPU，有什麼特別，可以用來反制 Apple 開始唔用 Intel 做筆電處理器的事件嗎？
歡迎大家上 ePrice 新開的 Patreon 頻道，我們會以會員付費方式，帶給大家更詳細的「技術分析」文章，關於 Intel Core i5-L16G7，為何會有這粒 CPU 出現，都有故仔的， Click 入這裡，付費成為會員，就可以聽得到!
總結
疫情下要 WFH 的處境，其實好多網友都私下問過本 YK 有無乜好筆電推介。臨時臨急要買一部合適自己工作用途的機係有一定難度。但令我意外的係，傳統上認知會覺得 15.6 吋大筆電，才會是在家工作的好選擇，畢竟性能好、散熱好、屏幕大。
但武漢爆發肺炎以來，大部分網友要求的 WFH 筆電卻是續航好、夠輕薄、造工佳、最好屏幕唔太大又有 TOUCH 芒。後來瞭解到其實有不少網友家居乃蝸居，食飯檯工作、甚至床上工作亦變成常態。 有個網友甚至同我講，出現突發任務時，連去個廁所都要帶住手機、電腦入去拯救世界！ 完全顛覆了本 YK 對筆電選擇的認知。
當然，Samsung Book S 確實做到神奇的纖薄輕巧、續航強勁，雖然新型處理器的效能一般，但已滿足一般文書用戶的需求。 流動性強大的優勢，唔係只係出街先體驗到；屋企無工作臺的 Book S 用戶都能夠輕鬆穿梭飯檯、廁所、床鋪。
Galaxy Book S 產品規格：
| 型號 | Galaxy Book S | |
| 操作系統 | Windows 10 Home | Windows 10 Pro |
| 顯示器 | 13.3吋 FHD LED 顯示屏 1920 x 1080 解像度 觸控屏幕 |
|
| 處理器 | Intel® Core™ i5-L16G7 | |
| 儲存空間 | 512 GB eUFS | |
| 記憶體 | 8 GB LPDDR4x Memory | |
| 圖像處理 | Intel® UHD Graphics | |
| 連接埠 | 兩個USB-C® MicroSD 讀卡器 |
|
| 輸入 | 島型鍵盤 觸控板 指紋感應器 |
|
| 無線連接 | Wi-Fi 6 (Gig+), 802.11 ax (2x2) 藍牙 v5.0 |
|
| 鏡頭 | 1MP 網路攝影機 | |
| 音訊 | 數碼陣式雙麥克風 AKG雙聲道揚聲器 (1.2 W x 4) Dolby Atmos® 音效 二合一 耳機輸出 / 麥克風輸入 |
|
| 電池及電源 | 內置42Wh 電池 (Typical) 25W USB-C® 變壓器 |
|
| 顏色 | 水星灰、粉紅金 | 水星灰 |
| 尺寸 | 305.2 x 203.2 x 11.8毫米 | |
| 重量 | 0.95千克 | |
Galaxy Book S 建議零售價如下：
| 型號 | 顏色 | 建議零售價 | |
| Galaxy Book S（Windows 10 Pro版） | 水星灰 | 港幣8,980元 | |
| Galaxy Book S（Windows 10 Home版） | 水星灰 | 港幣8,480元 | |
| 粉紅金 |