滙豐 HSBC 推「跨行現金存款服務」！恒生櫃員機終於有得存錢去滙豐戶口 方便咗？

左定坤 (Cho Ting Kwan) 2022-12-05 15:26 | 科技新知

滙豐同恒生，相信都係最多人用嘅銀行之一，呢兩間銀行屬於同一集團，子母公司，所以平時如果你去櫃員卡撳錢，你可以去恒生櫃員機撳滙豐戶口嘅錢，又或者調返轉去滙豐櫃員機撳恒生戶口嘅錢。但神奇地，既然呢兩間都係子母公司，用互相嘅櫃員機提款無問題，咁點解存款又唔得呢？一直以來，你只可以滙豐櫃員機存錢入返滙豐戶口，恒生入返恒生，但唔可以滙豐入去恒生或者恒生入去滙豐，呢件事會唔會有少少奇怪？不過，今日滙豐終於宣佈，推出跨行現金存款服務！想知詳情，睇下文啦！



滙豐今日發出新聞稿，宣佈由即日起客戶除咗可以透過滙豐旗下提供存款功能的自動櫃員機（包括「存錢妥」以及「提存易」存入現金之外，亦都可以經恒生銀行營運嘅相關自動櫃員機存款至滙豐帳戶，滙豐表示今次係市場首創嘅跨行自助現金存款服務，令客戶自助存款嘅地點增加至約 370 個。

無可否認，呢個功能嘅推出係一件好事，真心會方便咗，雖然呢個功能應該一早就要推出，明明有得互相提款，但就無得入錢，成件事有點奇怪。而家有返呢個功能，我會認為合理返，而我期待既然呢個服務叫「跨行現金存款服務」，可唔可能有一日，可以打通所有銀行，一部機終於存錢去恒生滙豐又得，存錢去其他銀行都得，咁樣就可以帶來真正嘅方便。網友又點睇呢？