疫情初網購成主流
我哋睇返疫情初期嗰陣，其實 Amazon 曾經係咁擴張人力，喺 2019 年年尾至 2021 年年尾期間，Amazon 合共增加咗 80 萬個員工，主要係做倉庫嘅，因為消費者喺疫情初期，好多時都會好依賴網上購物，其實我哋自己都一樣，記得嗰陣個個出街要口罩，但口罩一罩難求嗰陣，我哋都會上 Amazon 度格價，都唔可以話係格價，而係有，就要買。曾經仲誇張到要買埋豬咀𠻹，唔知網友又有無呢啲共同嘅經歷呢？疫情過後市場不穩定性增加，決定裁員減低開支成本
但當疫情開始慢慢減少，好多人都開始慢慢恢復實體消費，所以好似 Amazon 呢啲以網購為主嘅公司，就開始逐步裁減一啲未有賺到錢部門嘅人力，上年 Amazon 宣佈會喺 1 月份裁員 18000 人，當時大部分裁員集中喺零售以及招聘方面，而最近佢哋再宣佈將會再裁 9000 人。根據 Amazon CEO Andy Jassy 畀員工嘅 Memo 入面就提到，「鑒於我哋目前所面臨嘅經濟環境，以及對於未來有好多不確定性，所以我哋選擇更加精簡成本以及員工人數」。而有消息指出，今次裁員主要會影響到 Twitch 遊戲影片串流媒體服務、廣告、雲端運算等等嘅部門。
另外，Andy Jassy 亦警告，最終裁員計劃要到 4 月中下旬先至可以有最終確定，喺最終確定之前，Amazon 係唔會通知受影響嘅員工。而 Jassy 亦補充，Amazon 承諾會為員工提供遺散費、過渡性健康保險，並且會幫佢哋喺第二度搵工。
相比其他科技大公司，今次 Amazon 裁員人數佔比相對少
不過相比起其他科技大公司嘅裁員，今次裁員佔 Amazon 員工總數嘅比率相對較少，睇返 2022 年 12 月嘅數據，Amazon 員工總數達到 150 萬人，咁而家裁 9000 人，其實計返嚟講都唔算多，只能怪真係有啲部門賺唔到錢，唔係話呢班員工唔勤力，但有時好努力，都未必一定會有回報。咁部門賺唔到錢，公司都無理由仲繼續投放資源喺佢哋度，而家 Amazon 仲承諾會幫埋佢哋搵工，我覺得都算係給予員工嘅一個保障。來源：Engadget