上星期 Apple 就召集咗公司大約 100 個頂級高層，開咗一個好重要嘅會，而呢班人圍埋一齊做乜嘢呢？佢哋圍埋一齊唔係吹水聚舊，而係一齊見證 Apple 好重視嘅一款新產品，佢就係一款 AR / VR 頭戴裝置 (或者可以話係 MR 裝置)，個名傳聞叫 Reality Pro。
事實上，其實今次唔係 Apple Top 100 高層第一次見到呢款頭戴裝置，由 2018 年開始，Apple 嘅技術開發團隊，每年都會好小心咁向公司嘅最高決策人展示呢款產品，但同之前唔同嘅係，之前係好低調嘅，旨在展示進展並且確保繼續研發需要嘅人數，而今次咁高調喺 Apple 最大嘅展示廳 Steve Jobs Theater 舉行，咁可能意味住正式推出嘅日子越來越近，
Apple 高層唔睇好 Reality Pro 一推出會成為大熱產品
根據 Mark Gurman 嘅講法，成個演示係好令人興奮，但好多 Apple 高層都好清楚，Apple 好清楚如果佢哋要進軍呢個虛擬實境市場嘅話，需要面臨好多挑戰。講到 MR，即係融合咗 AR 同埋 VR 嘅一個類別，佢屬於科技界一個新興嘅領域，並且比起 Apple 以往多次嘗試踏足其他新市場所面對嘅挑戰，今次佢哋嘗試打入混合現實嘅市場，相比之下風險更大。同 Mac、iPod、iPhone、Apple Watch 同 iPad 唔同，Apple 實際上係一直將大家好熟悉嘅產品一直咁改良，希望愈做愈好，但對於 AR VR 頭戴裝置，Apple 要重新再同消費者解釋，點解佢哋想要擁有呢件產品，點解唔用佢唔得，呢個係挑戰之一。
另一個挑戰係，傳聞中嘅個 Reality Pro 起價大約為 3000 美金，計返港紙即係差不多 $24000，缺乏明確嘅殺手級應用，而且仲需要每隔幾個鐘就要換一次電，兼且佢所用嘅設計，連一啲測試人員都覺得唔係咁舒服，而且媒體嘅內容亦可能有限。
Reality Pro 或會遵循同 Apple Watch 類似嘅軌跡
所以，考慮到以上幾點，Apple 高層們喺公司內部都採取比較現實嘅態度，唔會睇好 Reality Pro 可以一推出就即刻成為熱門產品，但佢哋認為 Reality Pro 可能可以做到遵循同 Apple Watch 類似嘅軌跡，即係咩意思？即係 Apple Watch 推出得好慢，而且推出嘅時候支持嘅應用程式又好普普通通，界面會好混亂、處理器會好慢，而且用途亦都唔會好明確，但隨住時間推移，Apple 慢慢改進第三方 App 嘅功能，簡化操作系統並且升級更加快嘅處理器，最後終於搵到自己定位，佢係一個健身嘅追蹤器，一個健康伴侶，一個處理通知嘅簡便工具。而呢 8 年來，Apple Watch 由 Apple 業務嘅一個好細嘅部份，慢慢成為咗核心嘅產品之一。而 Apple 高層正正就係希望，或者可以話係預期，Reality Pro 會有好似 Apple Watch 類似嘅結果。就銷售量嚟睇，第一個版本預計同公司現有產品相比，會顯得無足輕重，但佢仍然係有可能會喺幾個月內令 Apple 成為 MR 領域嘅市場領導者，但呢樣都可能只係市場疲軟嘅一個跡象。而當 Reality Pro 嘅下代機款推出嘅時候，Apple 高層預計消費者嘅興趣會增加，根據目前傳出嘅消息表示，Apple 正喺度準備一部成本只有 Reality Pro 一半嘅頭戴裝置，以及性能更好嘅第二代 Reality Pro，而呢啲下一代嘅產品，預計會喺第一代推出之後兩年內出現。
第一代產品推出預計沒有利潤可言
至於 Apple 對第一代 Reality Pro 嘅銷售情況嘅預測，Apple 目前仲相信佢哋可以喺第一年賣到大約 100 萬部頭戴裝置，以每部 3000 美金計算，意味住收入大約有 30 億美金。考慮到設備入面所用嘅零件相當昂貴，而且 Apple 目前唔會搵尋求增加利潤嘅迭法，所以佢哋估計一開始幾乎唔會有任何利潤。來源：Bloomberg