航空業嘅奧斯卡
來自世界各地航空公司嘅 350 多名業界人員參加咗 2023 年嘅世界航空大獎 (Skytrax World Airline Award) 活動，好多航空公司嘅 CEO，總裁同埋高級管理層都出席接受佢哋嘅獎項。世界航空大獎始於 1999年，被視為「航空業嘅奧斯卡」，所有嘅客戶調查費用同埋獎勵活動都由組織者 Skytrax 支付。今年超過325家航空公司參與咗調查結果。新加坡再贏！國泰名次有回升
新加坡航空喺 2023 年嘅世界航空大獎上被選為世界最佳航空公司，呢個係佢哋喺呢個獎項 23年嘅歷史上第五次獲得年度航空公司嘅稱號。得咗年度航空公司獎項七次嘅卡塔爾航空，喺2023年被評為世界第二，全日空名列第三，阿聯酋航空位列第四，日本航空位列第五，以香港為基地嘅國泰航空，今年由往年 16 位，升返十大位置，名列第八。同時，國泰航空都被評為擁有世界最佳機上娛樂嘅航空公司。商務艙、頭等艙最強就係佢哋
出 Trip 當然想坐商務艙，去玩又有錢一定想試頭等艙。卡塔爾航空喺商務艙上繼續主導，贏得咗世界最佳商務艙，世界最佳商務艙坐位及世界最佳商務艙候機室（哈馬德國際機場嘅 Al Mourjan 候機室），世界最佳商務艙候機室食物。新加坡航空喺頭等艙旅行獎中占主導地位，贏得咗世界最佳頭等艙，世界最佳頭等艙坐位，世界最佳頭等艙舒適設施嘅獎項。經濟艙亞洲公司最好
經濟艙相信大家最坐得最多，嚟自台灣嘅 EVA 長榮航空贏得咗世界最佳豪華經濟艙嘅獎項。長榮航空仲贏得咗最佳豪華經濟艙飲食獎。日本航空喺經濟艙中排名第一，贏得咗世界最佳經濟艙同世界最佳經濟艙坐位嘅獎項。「廉航」要坐佢
想平平地去玩，好多人揀 low cost airline 即係我哋叫嘅「廉航」。其中，亞洲航空 Air Asia 再次獲得世界最佳低成本航空公司獎項，呢個係佢哋自 2010 年以嚟每年都獲得嘅榮譽。新加坡嘅 Scoot 則獲得咗世界最佳長途低成本航空公司嘅獎項。Volotea 被評為歐洲最佳低成本航空公司。最適合家庭嘅航空公司
2023 年 Skytrax 新增咗一個獎項，世界最適合家庭嘅航空公司，呢個獎項由加拿大航空 Air Canada 贏得。呢個獎項包括家庭坐位政策、專用嘅家庭報到設施、優先登機、兒童飲食、兒童禮品/玩具/活動包、對兒童嘅機上娛樂、免費托運行李同搖籃/推車政策，同埋地勤人員同機艙乘員喺旅行過程中嘅服務水平。Plaza Premium 勇奪貴賓室大獎，香港有份
我哋叫 PP 或者香港機場「魚蛋河」嘅環亞 Plaza Premium Lounge 旗下嘅好多間 Lounge 都有獎，位於羅馬菲烏米奇諾機場嘅 Plaza Premium Lounge Rome Fiumicino 喺 2023 年獨立營運嘅機場貴賓室，排名全球第一。香港嘅 Plaza Premium Lounge，雖然，有人話似「難民營」其實，佢係 2023 年度，排全球第七架！China Only 最叻係佢
最後，最後想講嘅係，如果你有幸要坐中國大陸嘅航空公司，揀邊間好呢？原來 Skytrax 都有獨立中國選項！香港航空嘅母公司：海南航空被評為中國最佳航空公司，呢個係該公司第 12 次獲得呢個獎項，並且仲獲得咗中國最佳航空公司員工獎！2023 年世界航空大獎 (Skytrax World Airline Award) 全球廿大航空公司
| 名次 | 航空公司 | 有否直航香港 |
| 1 | Singapore Airlines 新加坡航空 | 有 |
| 2 | Qatar Airways 卡塔爾航空 | 有 |
| 3 | ANA All Nippon Airways 全日空 | 有 |
| 4 | Emirates 阿聯酋航空 | 有 |
| 5 | Japan Airlines 日本航空 | 有 |
| 6 | Turkish Airlines 土耳其航空 | 有 |
| 7 | Air France 法國航空 | 有 |
| 8 | Cathay Pacific 國泰航空 | 有 |
| 9 | EVA Air 長榮航空 | 有 |
| 10 | Korean Air 大韓航空 | 有 |
| 11 | Hainan Airlines 海南航空 | 有 |
| 12 | Swiss Int'l Air Lines 瑞士航空 | 有 |
| 13 | Etihad Airways 阿提哈德航空 | 有 |
| 14 | Iberia 西班牙國家航空公司 | 無 |
| 15 | Fiji Airways 斐濟航空 | 有 |
| 16 | Vistara 維斯塔拉航空 | 無 |
| 17 | Qantas Airways 澳洲航空 | 有 |
| 18 | British Airways 英國航空 | 有 |
| 19 | Air New Zealand 紐西蘭航空 | 有 |
| 20 | Delta AirLines 達美航空 | 無 |
資料來源；Skytrax