Rokid Glasses 開箱看外觀
作為一副要成日戴住的智能眼鏡，外觀同舒適度絕對係首要考慮。Rokid Glasses 由中國 AR 眼鏡龍頭品牌 Rokid 與時尚太陽眼鏡品牌 Bolon 聯手設計，鏡身採用鋁鎂合金物料，重量只有 49g，同普通太陽眼鏡差唔多。版主拎上手第一個感覺就係「輕」，而且鏡臂採用 TR90 彈性材質，即使我頭型偏大，戴上去都唔會有夾頭感，可調節鼻托設計都幫到分散壓力，長時間佩戴都幾舒服。
▲Rokid Glasses 包裝盒，設計簡約。
▲我上手的是黑色版本，鏡臂具鋼琴烤漆質感，幾有品味。
▲鏡片在某些角度會有點反光，但日常使用影響不大。
值得一提係，Rokid Glasses 針對近視或散光用家，提供磁吸卡扣鏡片套裝，可以輕鬆加裝度數鏡片，真正照顧到日常佩戴需要。版主覺得呢個設計好實際，唔使擔心戴唔到或者要另外配眼鏡。
廣東話AI語音操控！實測翻譯、提詞功能
智能眼鏡核心當然係 AI 功能，Rokid Glasses 內建 Qualcomm Snapdragon AR1+ Gen1 晶片，並整合多個 AI 模型（包括通義千問、豆包、智譜清言等），支援廣東話語音操控，對香港用家來講真係一大福音！喚醒 AI 的方法為「Hi Rokid」，版主實測幾個主要功能：
▲ 叫 Rokid 話畀我聽，眼前有啲乜。
▲ 叫 Rokid 帶我去旺角，如果你無講明，預設係駕車嘅導航，你要講清楚，係「帶我步行去旺角」，咁就得。
▲ 玩下問下 Rokid，我呢位朋友靚唔靚仔，佢都一樣可以講笑咁同你分析。
▲ 用電腦，開咗篇 ePrice 文章出嚟，叫佢分析篇文講乜，佢都一樣做到。
▲ AI 表示唔會記住你問過啲乜。
雙目光波導技術！屏幕顯示清晰嗎？
Rokid Glasses採用雙目衍射光波導技術，配備全球最細 0.15cc 微型 LED 顯示引擎，屏幕亮度最高達1500 nits，即使陽光下都能清晰睇到內容。版主實際佩戴，發現資訊會顯示在眼鏡中間偏下位置，唔使特登向下望，字體清晰，閱讀體驗不錯。不過，單色顯示同解析度有限，暫時只適合顯示文字同簡單圖標。
第一身視角拍攝！實測影相錄片效果
Rokid Glasses 左上方配備 1200 萬像素鏡頭，支援 Low-Light HDR 同 60fps 錄影，可以透過語音或觸控進行第一身視角拍攝。版主試玩後覺得，拍攝效果算係合格，日光下影像細節夠，色彩自然；但低光環境表現一般，動態畫面有輕微拖影。用來記錄生活點滴或者快速影低靈感係夠用，但就唔好期望有手機級數畫質。
▲Rokid Glasses 隨便拍攝，成像表現一般。