設計與工藝：紫金交輝，將智能錶當珠寶造
今次華為喺設計上落嘅重本，可以話係智能手錶史上少見。最大賣點係錶圈用上 業界首創嘅複合稀土紫色陶瓷，要經過 1400°C 高溫燒製，再以微米級技術切割成十二邊形。唔單止咁，錶圈上更鑲嵌咗六段 18K 黃金，字符仲用上 24K 純金，成個工序由工藝大師純手工鑲嵌，呢份奢華感，確實同一般鋁合金或不鏽鋼錶殼嘅智能錶唔同層次。錶殼亦唔簡單，採用咗非晶鋯合金打造，並進行鏤空設計，減輕重量之餘，仲嵌入四段18K金作點綴。隨錶附送嘅紫色間金鈦金屬錶帶，採用 TC4 航天級鈦合金，鍍上超硬紫色膜，官方稱堅固耐磨。簡單啲講，華為幾乎將造高級腕錶嘅心思，完全搬咗去造呢隻智能錶身上。
強悍規格：150米潛水、eSIM獨立通話、專業運動追蹤
當然，作為ULTIMATE DESIGN系列，強悍功能先係根基。佢繼承咗系列招牌嘅 150米專業潛水模式，並支援「聲納水下通訊」技術，潛水員之間可以在水下 30 米內透過手錶傳送文字或 SOS 求救訊息。對於高爾夫球愛好者，內置全球超過 17,000 個球場地圖及 3D 球道圖。戶外探險則有雙頻五星定位系統及航跡返航功能。健康管理方面，搭載 HUAWEI TruSense 玄璣感知系統，配合新增的 X-TAP 感應器，號稱數據採集更準。一鍵「微體檢」功能，60 秒可以得出 10 項以上健康指標報告。同時支援 ECG 心電圖分析、血氧、睡眠及壓力監測等全面功能。
日常便利性有eSIM獨立通話，可以完全脫離手機打電話；支援腕上支付、獨立播放音樂等。續航方面，官方數據顯示，在「全能模式」常規使用下可達4.5天，而開啟超級省電模式則最長可達11天。
售價與預購：身價不菲，附送尊享禮遇
一如所料，極致奢華嘅代價絕不便宜。HUAWEI WATCH ULTIMATE DESIGN 紫金款香港建議零售價定為港幣 $26,888。凡購買港澳原廠行貨，可獲贈包括 HUAWEI智能體脂磅、三個月 HUAWEI Health+會員 以及 HUAWEI Care+（1年延長保養及2次意外保險） 在內嘅尊享禮遇。