首發支援機型：GT Runner 2 及 Band 11 系列
今次華為宣佈 HUAWEI WATCH 支援 AlipayHK，對於本地用家嚟講絕對係一大喜訊。首批出廠就已經原生支援呢個功能嘅，就係剛剛新鮮發佈嘅兩款新品：主打專業跑步嘅 HUAWEI WATCH GT Runner 2，同埋超輕薄大芒嘅 HUAWEI Band 11 系列。如果你打算買呢兩款新機嘅用家，到時就即刻可以享受手錶付款嘅便利！至於現有其他 HUAWEI WATCH 型號嘅用家都唔使灰心，官方表示之後會陸續透過系統更新去加入呢個功能，大家可以期待一下。
AlipayHK 手錶付款設定教學
要在 HUAWEI WATCH 上設定 AlipayHK 付款其實好簡單，成個過程只需幾分鐘。根據官方提供嘅設定流程圖，版主同大家拆解一下步驟：1. 進入支付應用程式推介： 喺手錶主目錄搵到並點擊「支付應用程式推介」。
2. 啟用 AlipayHK： 喺清單入面搵到「AlipayHK」，點擊「啟用」。系統會提示「AlipayHK 已啟用，完成並新增至應用程式主屏幕」，點擊「完成」。
3. 進行綁定： 再次打開 AlipayHK 應用程式，點擊「開啟」，然後選擇「立即綁定」。
4. 設定密碼保安全： 基於法規要求，使用支付前需要設定密碼，點擊「剔號」確認。然後輸入你想設定嘅密碼，並選擇密碼生效範圍（例如「在裝置生效」）。
5. 手機掃碼確認： 手錶畫面會彈出一個 QR Code（二維碼）。呢個時候攞出你部手機，用 AlipayHK App 掃描手錶上嘅 QR Code。
6. 完成綁定： 手機會彈出「啟用手錶付款」嘅確認畫面，點擊「立即綁定」。手錶顯示「綁定中，請在手機上操作」，稍等一陣，當手錶出現 AlipayHK 嘅圖示，就代表大功告成！
以後你去到便利店或者超市買嘢，只要喺手錶度打開 AlipayHK，展示付款碼，畀店員掃一掃就可以直接過數，非常方便快捷！
