老老實實，我自己唔算係 ShopBack 嘅重度用家，真係要買 VPN，或者間中買下淘寶、拼多多先會開嚟用下。點知最近一開個 App，竟然見到個帳號被標示為「閒置帳戶」！最激氣嘅係，呢個情況已經唔係第一次發生。
之前第一次中招，完全申訴無門，迫住唯有開過個新帳號。結果而家第二次又嚟料，真係佛都有火！遇到呢啲事，第一時間當然係搵客服，點知佢哋啲客服真係從來都幫唔到手。個智能客服成日答非所問，一時又話乜嘢「一年無上線就會標示為閒置帳號」，大佬呀，我個新帳號開咗根本都唔夠一年，個系統簡直係九唔搭八。
見 AI 唔掂，我就轉戰 Email 搵人工客服，結果次次都係收到同一個 Copy & Paste 嘅官方廢話回覆，封 Email 係咁寫嘅：「閣下的 ShopBack 帳戶已被相關部門停用，該決定經過了必要的核實程序。由於隱私政策的考量，我們無法提供具體的詳情。若需了解更多相關規定，請參考使用者條款。」完全係一副「封咗你就封咗你，唔使同你解釋」嘅態度。
我真係得啖笑，明明都無乜點用過，完全想像唔到到底違反咗啲乜嘢條款。問親又唔講，死無對證唔清唔楚咁。有時心諗，難道之前推薦朋友用都係違反規矩？如果係咁，真係唔好推薦朋友用會更好，費事害親人。唔知大家有無試過遇到類似嘅無理封鎖事件？
留言分享下，睇下係咪得我一個咁黑仔！