「 開心盡在日本城 」No more…
「 開心盡在～日本城！ 」呢句經典廣告歌，相信每個香港人聽起上嚟，個腦都會自動有聲。日本城喺 1991 年創立。當年佢哋喺沙田開設第一間細細嘅 十蚊店 ，憑住 平、靚、正 嘅優質進口日本家品，迅速喺香港打響名堂。時移勢易， 日本城喺香港同澳門已經擁有超過 260 間分店，真係總有一間喺左近 ，成為大家買地拖、水桶嘅首選。不過，集團決定喺 35 周年之際，進行一次翻天覆地嘅大革新，改名唔要香港人鄉下嗰名，仲有一啲策略上嘅改變。點解要告別日本 ？
好多網民一聽到「 日本城 」改名，都大呼「 唔習慣 」，甚至質疑點解要改走個招牌名字 。日本城母公司國際家居零售主席兼集團行政總裁解釋，35 年前創立嗰陣，確實係靠進口優質日本貨品建立市場定位。但今時今日，集團嘅全球供應鏈已經非常成熟，單一產地標籤已經唔能夠反映目前多元化嘅經營模式。所以，由 2026 年 7 月 15 日起，品牌正式更名為「 JHC 真好城 」。
網民唔 Buy「 真好城 」被笑似內地品牌？
消息一出，各大 Social Media 隨即掀起洗版式討論，網民嘅創意留言令人啼笑皆非，係佢哋嘅 Facebook 專頁有以下留言：經典廣告歌失守？：最令網民關心嘅，梗係首洗腦主題曲。唔少人留言笑問：「 以後行過門市，係咪要改唱『 開心盡在～真好城～ 』？好似有啲唔順口喎！ 」
英文縮寫神解讀：有創意爆棚嘅網民指出：「 以前 JHC 係 Japan Home Centre ，依家 JHC 係咪變咗 Jin Ho Centre （ 真好 Centre ）嘅廣東話拼音？ 」
新名被嫌太過土：雖然品牌寓意「 最真・最好 」，但唔少街坊直言新名好老土：「 聽落好似內地啲超市或者淘寶鋪頭名 」、「 其實就咁叫 JHC 咪幾好，真好城 聽落好似以前啲街坊涼茶鋪 」。
聯乘 YOHO 友和與 HKTVmall：搶攻 3C Product 網購市場
今次品牌升級嘅重頭戲，莫過於 JHC 喺線上線下融合。尤其係喺 3C Product（ 電腦、通訊及消費性電子產品 )網購同生活科技領域， JHC 玩咗一場 借東風 嘅動作：001: 聯乘友和，發揮線下網點優勢
街坊以後喺 YOHO 友和網購 3C Product、電子配件或者智能家電之後，可以直接去就近嘅 JHC 分店取貨。
002: 引進京東京造與 OCHAMA：豐富 3C 及小家電選擇
除咗做自提點， JHC 亦主動出擊。自 2026 年 5 月起， JHC 已經成功獲得 JD 自家品牌「 JD 京造以及歐洲品牌 OCHAMA 嘅銷售權。呢兩個品牌涵蓋大量高性價比嘅小家電、生活家品同科技產品，涉及線上超過 1000 種產品。顧客只要喺 JHC 網購平台直接落單，就可以直接運送到香港嘅 JHC 門市提貨。
003：拍住 HKTVmall 凍肉有得攞
除了 3C 電子產品， JHC 真好城亦同 HKTVmall 展開深度合作，成為其網購取貨點，服務範圍甚至涵蓋埋需要冷藏嘅貨品。街坊一邊攞網購嘅 3C 產品，一邊攞埋凍肉餸菜，真係方便到極點。