Apple Watch 領導智能手錶市場
根據 Bloomberg Power On 專欄，Mark Gurman 嘅爆料，自從 Apple 在十幾年前推出第一代 Apple Watch 開始，產品嘅演進主要集中喺微調、變薄、加大螢幕或者推出 Ultra 系列，同時加入咗心電圖、高血壓偵測同睡眠窒息警示等健康功能。雖然自 2018 年推出 Series 4 嘅設計語言之後，整體外形一直冇太大改變，但憑住穩定嘅表現，Apple Watch 依然係市面上最暢銷嘅智能手錶。根據 Counterpoint Research 嘅資料顯示，Apple 嘅手錶銷量喺首季仲錄得明顯增幅。暫未有大改動
不過，面對 Oura Health、Whoop 同埋 Alphabet 旗下 Google 嘅挑戰，加上市場上愈嚟愈流行輕便嘅無螢幕健身手環同智慧戒指，Apple 已經開始認真應對呢個行業轉變。消息指，Apple 嘅工業設計團隊喺過去一年左右，一直喺度研究點樣重新構思智能手錶，並且評估緊多個唔同嘅方案。短期之內，Apple Watch 依然會維持相對溫和嘅升級步伐。好似即將推出嘅 Series 12 同 Ultra 4，預計會迎來近年最實際嘅效能提升。同時，品牌亦計劃喺今年或出年重新引入陶瓷錶殼選項，並且會提供新嘅顏色、錶帶以及一系列健康同健身功能升級。未來可能有無螢幕穿戴裝置
長遠嚟講，Apple 已經開始考慮推出完全冇螢幕嘅新裝置，甚至連圓形螢幕都有被納入考慮之列。除此之外，隨住 AI 版本 Siri 助理嘅推出，加上由 Eddy Cue 領導嘅健康應用程式革新，Apple 正計劃將手腕裝置變得更加以人工智能為核心，希望藉此激活近年增長放緩嘅穿戴裝置業務。雖然 Apple 仲未落實最終嘅設計方向，但種種跡象顯示品牌正準備為產品線帶來革新。呢啲轉變雖然需要時間，但有望為用家帶來全新嘅使用體驗。來源：Bloomberg Power On