與冠忠巴士合作 最多可坐六人
Uber 宣布與冠忠巴士集團有限公司合作，由即日起在香港推出 Uber Elite。乘客可直接透過 Uber App 預約行程，車款以最多可接載六名乘客嘅豪華 MPV 為主。今次 Uber Elite 並非由一般 Uber 司機接單，所有行程均由冠忠巴士旗下、持有有效「出租汽車許可證」嘅車隊負責，並由合資格專業司機提供服務。換句話說，Uber 就負責預約平台、行程安排同收費，實際接送則交由冠忠巴士嘅專業車隊處理。
唔止有車坐 機場仲有人接
既然叫得做 Elite，服務當然唔只係架車豪華少少。所有司機都會穿着制服，並要完成六小時專業培訓課程及通過考核，內容包括行車安全、服務標準以及 Uber App 操作等。如果預約機場接送，Uber Elite 更會安排專人於抵港接機大堂迎接，再帶乘客前往指定上客位置，對於帶住大量行李、第一次到香港，或者要接待公司貴賓嘅用家，確實會方便好多。車廂內亦會提供免費 Wi-Fi、樽裝水、小食、流動裝置充電設備以及濕紙巾，定位明顯係針對商務旅客、企業高層、高淨值人士及海外旅客。企業用戶如果要幫客戶或者嘉賓安排接送，亦可以直接透過 Uber App 預約。最早兩小時前預約 機場免費等足一小時
Uber Elite 採用預約制，乘客最早可以在出發前 90 日安排行程，最遲則要在出發前兩小時預約，對於機場接送或者一早安排好嘅商務行程會比較合適。等候時間亦比一般 Uber 寬鬆，一般行程提供最長 30 分鐘免費等候時間，機場接送就最長有 60 分鐘。即使航班落地後要等行李或者過關，都唔使因為遲少少上車而太過趕急。另外，Uber Elite 設有全日 24 小時客戶服務團隊，在預約及乘車期間提供支援。首程半價 最高可減 HK$2,000
為慶祝 Uber Elite 正式推出，由即日起至 2026 年 8 月 31 日，Uber App 用戶首次乘搭 Uber Elite，可享首程五折優惠，最高減 HK$2,000。實際車費則會按行程而定，乘客可以在確認預約前，直接透過 App 查看收費。
▲ Uber 香港區總經理鍾志霆 (左) 表示，香港作為國際金融及科技創新中心，市場對尊尚出行服務有一定需求，因此成為 Uber Elite 於亞太區首個推出嘅市場。