$500 有找  HONOR 推出全新開放式耳機 CHOICE Earbuds Open 3 

左定坤 (Cho Ting Kwan) 2026-08-19 15:36 | 科技新知

HONOR 最近宣佈喺香港推出全新開放式耳機 HONOR CHOICE Earbuds Open 3。呢款耳機獲得咗中國音響工業協會（CAIA）嘅「金耳之選」認證，主打舒適穩固同埋出色音質，為用家帶來新選擇。

仿生曲線設計

HONOR CHOICE Earbuds Open 3 用咗仿生曲線設計，配備 0.6mm 柔韌鈦合金框架同親膚液態矽膠塗層，可以完美貼合雙耳。耳機提供多點、多角度同三維支撐，能夠科學地分散受力，就算用家喺跑步、跳躍或者擺動等劇烈活動入面，耳機依然可以保持穩固。每隻耳機淨係重 8.8g，配埋均勻嘅配重設計，令用家佩戴時幾乎感覺唔到存在。

音質幾好

喺音質方面，耳機內置 18×11mm 跑道式驅動器，比上一代產品增大咗 40.4%，可以提供更充沛嘅能量輸出同更寬廣嘅聲場。透過獨立嘅後置聲學腔室，可以精準控制氣流同振動。智能音量調節功能確保音質喺唔同環境下都保持均衡，而動態等響度補償技術就喺唔同音量水準下維持深沉低音同細膩清晰度。通話方面，耳機支援雙咪高峰 AI 通話降噪功能同埋定向聲音傳輸系統，可以即時辨識人聲並抑制背景噪音，確保對話清晰。
 

10 小時續航

續航力方面，HONOR CHOICE Earbuds Open 3 支援 10 小時單次音樂播放，搭配充電盒更可支援 42 小時音樂播放，充電 10 分鐘就可以使用 2 小時。除此之外，耳機仲具備跨品牌 AI 翻譯、雙設備自動切換、快速連接彈出視窗、觸控操作、近場耳機搜尋同埋遊戲低延時模式等多種功能。HONOR CHOICE Earbuds Open 3 提供黑色及灰色兩種款式，建議零售價為 $499。