今年香港電腦通訊節 2026 涵蓋咗好多個特色展區，除咗平時見開嘅電腦產品同配件之外，仲設有 5G 應用、綠色科技同埋智慧健康等主題專區。現場集結咗大量科技品牌，現場即時提供唔少產品嘅即場折扣。
網絡設備優惠
喺網絡設備方面，各大品牌都推出咗唔少 Router 優惠。其中 TP-Link 就展示咗多款 Wi-Fi 6 同 Wi-Fi 7 Router，Wi-Fi 7 嘅入門型號會場優惠價降到 599 港元；而高階嘅 Wi-Fi 6 2.5G Router 價錢亦都由原價 3299 港元減到 2699 港元，吸引咗唔少對網速有要求嘅用家留意。
個人電腦同埋電競設備優惠
個人電腦同埋電競設備同樣係會場嘅主打。ASUS 同埋旗下嘅 ROG 品牌展出咗全線電競手提電腦同創作者電腦，售價由 3399 港元至 29299 港元不等。其中專為創作者而設嘅 GoPro Edition 筆記型電腦，機身重量只有 1.39kg，原價 49900 港元，會場優惠價直接減到 3998 港元，仲會隨機送 12 個月 GoPro Premium Plus 訂閱服務。另外，ROG Zephyrus G16 等熱門電競型號都有限定減價。現場仲有平價 Desktop 專區，入門級電競主機價錢平到 2199 港元就有交易。
流動配件優惠
流動配件同埋充電產品方面，唔少品牌都有推出 MagSafe 無線充電、大容量尿袋同埋多口快充頭等特價優惠。多款 10000mAh 嘅外置充電池售價平過 200 港元，部分展位仲有消費滿額送禮，例如買滿指定金額就會送 T1 手持風扇或者散熱配件。
電視、影音、網絡商產品
電視同埋影音產品專區入面，TCL 等品牌展出咗最新嘅 Mini-LED 同埋 RGB 電視系列，涵蓋 50 吋以上嘅大螢幕尺寸，會場發售嘅價錢都比起市面零售價有一定嘅減幅。至於學生用或者平價平板方面，BPC 等品牌展出咗多款幾百蚊到千幾蚊嘅 Android 平板電腦，其中支援 4G LTE 嘅 T65 Plus 平板售價係 1399 港元。電訊商同埋網絡服務供應商喺現場都有設 Booth，HKBN 等電訊商提供 2.5G 光纖寬頻服務優惠，月費平到 149 港元，仲會送價值 1000 港元嘅現金券或者禮品，吸引咗唔少想換家用寬頻嘅用家去查詢。
香港電腦通訊節 2026 提供由網絡設備、電競電腦、流動配件到家用影音等多元化產品選擇。以下影片有更詳細介紹，立即睇！