研發歷時六年 裝入 10 萬像素微距鏡頭自動瞄準
根據 Dyson 公佈嘅資料，呢部產品研發咗足足六年，動用咗 661 位工程師，申請咗 38 項專利。設計初衷係為咗解決大部分用家嫌麻煩而唔用牙線嘅習慣。研發團隊同新加坡國立大學牙科學院合作咗五年，整出專屬嘅「仿牙菌膜」去反覆驗證清潔效果，前後亦同全球 30 位牙科專業醫護人員合作測試。機身最大焦點係搭載咗一個 10 萬像素微距鏡頭，背後由一套名為 Gap Optical Targeting 嘅齒縫定位技術運作。鏡頭每秒會即時分析 28 張影像，去捉實同辨識牙縫位置。一旦鏡頭睇到牙縫，系統會喺 0.1 秒之內啟動加壓錐形噴流，直接對準牙縫噴洗。成套系統寫咗超過 1,600 萬行程式碼，背後嘅機器學習模型更用咗 47 萬張牙齒影像做訓練，確保面對唔同形狀嘅牙齒都可以認到牙縫。
告別針狀沖洗 錐形水流加變頻聲波震動
以往市面上嘅水牙線多數用好尖嘅「針狀水流」，好容易射穿牙菌膜但沖唔乾淨。Dyson CameraJet 就改用寬截面嘅「錐形噴流」，覆蓋範圍更闊，而且水壓經過調校，相對溫和，唔會咁易整傷牙齦或者琺瑯質。
刷牙動力方面，新機採用專利變頻聲波震動技術，入面嘅聲波摩打每秒震動達到 245 次。工程師發現傳統聲波牙刷用力壓落牙齒嗰陣，刷毛好容易會停低，所以新系統會動態調整擺動角度，令刷毛保持高速運作。喺變頻模式之下，清潔盲區牙菌膜嘅能力比起市場頂級旗艦電動牙刷多出高達 69%。刷頭採用弧形雙刷毛結構，外層軟毛用嚟清潔牙齦邊緣，內層硬毛就負責刷走牙齒表面嘅污漬。刷頭入面仲設有聲波減震器同專屬 RFID 晶片，會自動記錄刷牙次數同磨損狀態，夠期就會提醒用家換刷頭。
反重力水箱解決倒吸問題 3 秒自動注水底座
好多傳統水牙線傾斜嗰陣會吸到空氣斷水，Dyson CameraJet 機身內置 12.5 毫升儲水槽，採用反重力水箱配合隔膜泵同壓力艙，入面嘅彈性矽膠結構可以減少氣泡。無論洗後排牙齒嗰陣支牙刷係直立、打斜定係打橫，水流輸出都唔會中斷。隨機跟嚟嘅 3 合 1 補水底座結合咗收納、充電同加水功能。用家平時將牙刷插返入底座，撳個掣就可以喺 3 秒入面自動幫牙刷加滿漱口水，唔使每次拆開水箱慢慢斟。機身支援 2.4GHz Wi-Fi 同藍牙，用家可以開返 MyDyson App 睇住鏡頭嘅即時畫面刷牙，亦有覆蓋率分佈同數據分析。官方表示鏡頭只會喺即時睇或者噴水嗰陣先運作，機身同雲端都唔會錄影或者儲存畫面，保障用家個人私隱。
專用無泡牙膏與香港開售詳情
為咗唔好畀牙膏泡遮住鏡頭視線，Dyson 今次特別調配咗一系列專用口腔護理消耗品，包括完全唔含 SLS 起泡成分嘅專研無泡沫牙膏，以及專為錐形水流而設嘅低泡沫漱口水，提供綠薄荷同薑薄荷兩種口味，亦有抗敏配方。Dyson CameraJet 水牙線電動牙刷即日起喺香港開售，官方定價 $4290，提供「星空藍」同「粉霧玫瑰」兩隻顏色。包裝入面包括牙刷主機、兩支雙刷毛刷頭、3 合 1 補水底座連收納盒，同埋專用充電線。現階段買機仲會送價值 $178 嘅體驗套裝（包 75ml 綠薄荷牙膏及 400ml 漱口水）。