智能螢幕 HomeView 擔大旗配備 A18 晶片
根據報道，今次產品線嘅核心係全新智慧家居控制台 HomeView。呢部裝置配備螢幕同 A18 晶片，主要充當家庭入面嘅 Siri 語音控制中樞。HomeView 提供座檯同掛牆兩個版本，座檯版底座為金屬喇叭，提供太空灰、銀色、星光色同粉紅色四種選擇；掛牆版則採用貼牆方形底座，只設太空灰同銀色。報道提到，HomeView 唔會設立 App Store 下載額外軟件，只會預載少量 Apple 原生應用程式，操作主力靠 Siri 語音指令同觸控螢幕。
Apple TV 與 HomePod mini 同步換芯升級
除咗全新嘅 HomeView，Apple 亦會同步更新兩款現有影音裝置。新一代 Apple TV 將配備 A19 晶片，廠方測試過喺機身加入內置麥克風，等用家唔使拎住遙控器或者經 HomePod 就可以直接隔空向 Siri 發出指令；同時跟機遙控器亦測試加入喇叭，方便跌入梳化隙時發出聲響尋找。至於新版 HomePod mini 則改用 S10 晶片強化 Siri 運算，並提供粉紅、白、綠、藍同午夜色五種外殼。
罕有聯手 LG 打造入門配件陣容
為咗一改以往只提供底層軟件、欠缺周邊硬件支援嘅缺點，Apple 今次打破慣例，與 LG 深入合作開發一系列名為「Apple Home Collection」嘅智慧家居入門配套。合作產品涵蓋智慧門鐘、門鎖、恆溫器、溫度感應器，以及室內外保安鏡頭同探射燈鏡頭。相關產品由 Apple 負責外觀同技術設計，LG 負責生產同後續支援，既能維持跨裝置連動質素，亦有助壓低售價；另外喺歐洲市場，Apple 亦正與 Schneider Electric 合作開發能源管理配件。
補足 AI 生態缺口防止用家轉會
報道指，Apple 自二零一四年發表 HomeKit、二零一六年推出 Home 應用程式以嚟，一直受制於認證門檻高同 Siri 表現不穩，市場份額落後於 Amazon 同 Google。隨住生成式 AI 快速發展，智慧家居硬件成為各家爭奪家庭入口嘅關鍵。發售時間方面，新版 Apple TV 同 HomePod mini 預計喺十月三十日出貨，HomeView 則預計喺十一月中旬正式上市，至於 LG 合作嘅配件最快要到年底先會交付。
來源：Power On