觸控 OLED MacBook Pro 準備登場
根據著名 Blommberg 記者 Mark Gurman 透露，Apple 早喺 2023 年初就已經開始著手研發配備觸控螢幕嘅筆記型電腦。雖然最初目標定喺 2025 年底推出，但受制於供應鏈開發進度同內部優先次序調動，新機延遲到而家先真正準備好亮相。
今次作為全場主角嘅 14 吋同 16 吋高階 MacBook Pro，內部代號分別係 K114 同 K116。新機最大賣點係首度結合觸控操作同 OLED 螢幕技術，同時加入類似 iPhone 嘅 Dynamic Island 設計。為咗配合觸控輸入，新機會預載新版 macOS Golden Gate 系統，介面操作邏輯預計類似 iPhone Duo 針對新形態嘅系統改動。另外，新機喺重量方面會有明顯減輕，不過機身厚度就未有大幅變薄。
M6 晶片 Mac 系列與新版 iPad mini 同步亮相
除咗全新外形嘅高階筆電之外，Apple 亦會喺同一個發表會展示多款新產品。當中包括維持現有外觀設計、但核心升級至 M6 處理器嘅 14 吋 MacBook Pro 同 iMac。平板方面，新一代 iPad mini 同樣喺發表名單之上。呢部細尺寸平板會跟進換上 OLED 螢幕，並配備 A20 Pro 處理晶片。此外，機身前置 FaceTime 相機鏡頭會改放喺新位置，揚聲器系統亦經過重新設計。不過規格大幅升級亦令定價水漲船高，消息指新機定價會明顯高過現行嘅 599 美元，預計有機會去到接近 799 美元。
發表會時間與發售節奏安排
今次發表會預計會喺 10 月 27 日左右舉行。除咗線上影片發布之外，Apple 正考慮喺美國洛杉磯為創作者搞實體體驗活動，類似早前公布智能家庭新品時安排嘅雙軌模式。不過發表會嘅實體活動地點目前仲未完全落實，最終安排仍有待官方公布。今次活動預料會係 Apple 喺 2026 年嘅最後發佈會。去到 2027 年初，品牌就會將焦點轉向其他產品線，預計會陸續推出全新 MacBook Air、MacBook Neo、iPhone Air、iPhone 18、iPhone 18e，以及入門款 iPad、iPad Air 同 iPad Pro。
來源：Bloomberg