新一代 Apple TV 4K 換上 A19 晶片，CPU 效能比上一代提升最高可達 50％，而 GPU 效能亦提升最高達二倍，操作反應更靈敏、介面導覽更快捷。A19 晶片同時加入全新專屬 AV1 解碼器，令串流播放更具效率、畫質更出色，仲可以減少頻寬消耗。隨附嘅 Siri Remote 亦加入支援「精準尋找」嘅「尋找」功能，仲可以揀播放聲音，方便用家搵返遙控器。
影音體驗方面，用家而家可以利用 Apple TV 4K 同四部 HomePod mini (第 2 代) 或者 HomePod (第 2 代) 揚聲器，組合成四揚聲器環迴立體聲系統。系統識得自動識別每個揚聲器喺房入面嘅位置，從而自動校準音訊時序同音量。除咗娛樂之外，Apple TV 4K 亦繼續擔任強大嘅家居控制中樞，支援 Wi-Fi 同 Thread 技術，當連接相容門鐘時，電視畫面會直接彈出通知，讓用家即時睇到門外訪客並進行對話。
安全同私隱方面，Apple TV 4K 同 A19 晶片內置咗「安全隔離區」，將咪高風數據同系統其他部分獨立隔離。產品喺環保設計上亦用咗大量循環再造物料，包括循環再造金、錫、稀土元素同鋁金屬。全新 Apple TV 4K 定價為 $2399，即日起喺官網接受預訂，並會喺 11 月 13 日正式發售。
