外觀手感與佩戴：耳機本體偏大
上手第一時間見到新出嘅藍色款，實物磨砂質感做得幾紮實，機身亦具備 IPX5 防水，做運動流汗或者落毛毛雨都唔成問題。充電盒支援 USB-C 同 Qi 無線充電，日常放喺無線充電板上面幾就手。
▲ 充電盒蓋面印有 CAMBRIDGE 字樣，磨砂質感，前方設有三粒狀態燈。
▲ 打開充電盒，兩隻耳機以耳塞向上嘅方式擺放。
▲ 充電盒背面設有 USB-C 充電埠。
戴上耳方面，Melomania A100 SE 嘅耳機腔體因為要塞入 Class A/B 放大線路、10 mm 釹磁鐵單元同大電量電池，體積依然偏大，線條較為飽滿。如果耳窩偏細嘅用家，初初戴可能要花少少時間搵最啱自己嘅耳塞尺寸，否則戴得耐會有些少脹耳感。
▲ 耳機本體線條飽滿，耳柄印有 CAMBRIDGE 字樣。
▲ 兩邊耳機設有圓形觸控面板，每邊操作均可獨立自訂。
聲音實測：溫暖厚實英國聲，蜂巢式網罩改善高頻延伸
音質絕對係 Cambridge Audio 嘅強項。耳機支援 Bluetooth 5.4、LDAC、aptX Lossless、aptX Adaptive 同 AAC 等編碼。我駁落支援 Snapdragon Sound 同 LDAC 嘅 Android 手機試聽，聲音走向維持品牌標誌性嘅溫暖底色。10 mm 動圈單元嘅低頻扎實有彈性，唔會死硬轟耳；中頻人聲貼耳且厚度適中，聽廣東歌流行曲或者歐美民謠，人聲質感非常舒服。今次 SE 版換上咗重新設計嘅蜂巢式網罩，實際聽落高頻毛刺感控制得唔錯，小提琴同鈸聲嘅延伸平順咗，聽感自然耐聽。用《Melomania Connect》App 裡面嘅 7 段 EQ 調校，亦能好靈敏咁跟隨喜好微調聲音。
▲ 左耳機（L）出音嘴位置採用橙色蜂巢式網罩設計。
▲ 蜂巢式網罩特寫，係 SE 版嘅外觀同聲音調校重點。
Dolby Audio 空間音效：睇戲打機有感，聽歌視乎曲風
今次最大嘅新增功能係 Dolby Audio 音效處理。呢個功能係直接由耳機內部獨立晶片運算，唔需要手機系統特別支援，只要喺 App 裡面開閂就得。實測用佢嚟睇片同打機，左右聲道嘅分離度同空間寬闊感即刻拉開，聲畫定位清楚好多，睇動作大場面包圍感相當充足。打機方面，開啟延遲低於 80 ms 嘅遊戲模式，開槍同腳步聲基本上感覺唔到影音不同步。不過返去純聽歌嘅場景，開咗 Dolby Audio 音場係闊咗，但人聲距離感會推得稍為遠咗少少，建議聽立體聲流行曲嗰陣可以熄咗佢，睇片先打開享受環繞感。降噪、收音與操作：ANC 表現中規中矩，App 細節待改善
降噪方面，A100 SE 搭載 Qualcomm Adaptive 主動降噪，並設有通透模式。喺搭巴士、地鐵實測，低頻引擎轟鳴聲可以過濾到六至七成，但對辦公室嘅冷氣機聲、身邊人講嘢等高頻噪音，隔音效果就只屬一般，而且開啟降噪後聲音風格會有些微變化。如果追求極致安靜、要完全隔絕世界嘅話，佢嘅 ANC 表現未算最頂級。通話方面，左右耳機合共有 6 個咪高峰配合 Qualcomm cVc 降噪技術，喺街頭實測通話，人聲清晰度有交代，背景風聲壓抑得合理。耳機亦支援 Multipoint 雙裝置連接，我同時連住 MacBook 同手機，做嘢睇片中途有電話入，切換過程都幾順暢。稍微要彈嘅係操控同 App 體驗。喺實測過程中，《Melomania Connect》App 偶爾會喺自訂觸控手勢設定時出現輕微反應遲緩嘅情況，呢點就要等官方後續更新改善。
▲ 耳柄底部設有收音孔同充電觸點，配合多組咪高峰提升通話清晰度。
電池續航：長氣表現依然係最大賣點
續航力依然係呢隻耳機嘅殺手鐧。官方標示連充電盒最長可用 39 小時，開著 ANC 都有 21 小時。實測連續開住 LDAC 同降噪聽歌幾粒鐘，跌電速度依然相當慢，用成日完全唔使擔心電量問題。支援快充亦好方便，沖涼出門前擺入盒叉 10 分鐘，就已經夠聽 3 個鐘頭車程。
▲ 充電盒底部標示型號 CA0910、電池容量 3.7V 500mAh，並印有「Designed in Great Britain」。