唔係普通白色 會隨光線呈現珠光效果
今次珠光白並唔係單純將機身「油白」咁簡單。DJI 表示，手柄以及雲台外殼使用雲母珠光顏料，以白雲母及合成雲母為基底，再經過多塗多烤工藝處理，所以當光線以及觀看角度改變時，機身會呈現比較柔和、有層次的珍珠光澤。而且表面亦加入抗指紋以及抗污處理，對於白色機身來講呢點都幾重要，至少唔會一摸落去就成機指紋。規格無縮水 繼續雙主鏡頭
雖然今次主打新顏色，不過核心拍攝規格就完整保留。Osmo Pocket 4P 採用 雙主鏡頭系統，其中廣角主鏡使用 1 吋感光元件，官方表示最高支援 17 級動態範圍以及 D-Log 2 色彩。另一枚就係 60mm 中焦鏡頭，配備 f/1.8 大光圈。簡單講，廣角可以用來拍風景、街景或者自拍 Vlog，而 60mm 中焦就比較適合拍人物、食物或者特寫，唔需要好似以前咁純粹靠數碼變焦去「夾硬 Zoom」。對於拍片用家來講，雙鏡最大的實際好處就係構圖靈活好多。
以前 Pocket 系列最大的限制，其實就係鏡頭焦段比較單一；今次由廣角到 60mm 中焦都可以直接切換，無論旅行拍大景，定係想拍多啲有電影感的人像特寫，都有更多玩法。
4K / 240fps、10-bit 都有
其他拍攝規格方面，Osmo Pocket 4P 繼續支援 三軸機械增穩以及 智慧跟隨 8.0。影片最高可以拍攝 4K / 240fps 慢動作，同時支援 10-bit 色深以及機內底片色調。而對於經常拍大量影片的用家，今次機身亦內置 103GB 儲存空間，即使突然發現自己冇插記憶卡，至少都仲有內置容量可以頂住先。有線傳輸速度最高達 800MB/s，對於拍完一堆 4K 影片要過片去電腦剪輯，理論上都可以慳返唔少時間。最長 210 分鐘續航 18 分鐘充至 80%
續航亦係 Pocket 系列好多人會關心的一環。按 DJI 官方數據，Osmo Pocket 4P 最長續航時間可以做到 210 分鐘，而快充方面，最快大約 18 分鐘可以充至 80%。當然，實際續航一定會視乎你拍攝解像度、幀率、開唔開跟隨以及其他功能而有所不同，所以官方數字大家可以當成參考。不過如果純粹用來旅行拍 Vlog，一次充電基本上已經比以往更加夠用。珠光白標準套裝售價 $4,699
香港方面，Osmo Pocket 4P 珠光白標準套裝售價 HK$4,699。標準套裝內包括：Osmo Pocket 4P 珠光白主機、補光燈、1/4 吋螺紋手把、便攜收納袋、USB-C 至 USB-C PD 快充線（USB 3.1）。至於 Vlog 套裝就會稍後推出。另外 DJI Care 隨心換亦同步提供，其中 1 年版售價 HK$359，一年內提供 2 次低價替換；2 年版售價 HK$619，兩年內提供 4 次低價替換。