而今次米家推出的米家無線吸塵器 4 Max，版主覺得方向就相當清晰：280AW 大吸力只係其中一部分，真正主打其實係加入 自動集塵基座、藍光顯塵、防纏髮設計，以及多角度彎管，盡量將「吸完之後仲有一大堆手尾」呢件事減到最少。香港建議售價為 HK$2,499，到底值唔值得買？今次就同大家睇睇。
開箱：配件多到有少少誇張
先講開箱。米家無線吸塵器 4 Max 今次跟機配件其實幾齊，除咗吸塵器主機同自動集塵基座之外，仲有全效地板顯塵毛刷、迷你電動毛刷、梳化刷、浮毛刷、2 合 1 縫隙刷、彎管、延長桿以及延長軟管。換句話講，由普通地板、地氈、床褥、梳化，到窗邊、罅隙甚至寵物毛，其實一套已經基本上包晒。而且基座本身亦有配件收納設計，唔需要用完之後將幾個刷頭散晒周圍，呢點對香港家居環境其實幾重要，始終地方唔大，配件多還配件多，最怕就係最後冇地方擺。
最大賣點：用完一推返去，自動幫你倒塵
版主覺得今次最值得講的，其實唔係 280AW，而係個 4 合 1 自動集塵基座。平時用無線吸塵器最煩，其中一樣一定係倒塵。尤其屋企多人、長頭髮多，又或者有養寵物，用完之後打開塵盒，灰塵同頭髮一齊跌出嚟，有時倒完仲要自己用手清一輪，老實講真係幾麻煩。米家無線吸塵器 4 Max 用完之後，只需要將主機直接推返入基座，系統就會自動將集塵格內的垃圾吸入 3L 即棄塵袋。官方數據指，自動集塵效率最高達 99%，整個集塵過程約 11 秒。而 3L 塵袋官方更加標示最長可以做到約 100 日先換一次。不過呢個數字大家要留意，官方測試條件係約 100 平方米、三人家庭，每星期清潔及集塵三次，所以如果屋企有寵物或者每日都吸塵，實際更換頻率自然會高啲。
呢個功能睇落好似只係少做一個步驟，但如果你本身日日都會吸塵，其實方便程度真係會幾明顯。
280AW 吸力，數字已經去到旗艦級
當然，叫得做 Max，吸力都唔會弱。米家無線吸塵器 4 Max 採用 800W 高速無刷摩打，最高轉速達 150,000rpm，提供最高 280AW 吸力以及 27,000Pa 真空壓力。內部同時加入 12 錐氣旋分離系統，主要作用係先將灰塵、垃圾同氣流分離，減少濾芯太快堵塞而影響吸力。不過版主一直都覺得，吸塵器唔應該純粹睇一個 AW 數字。因為正常香港家庭，真正麻煩的好多時並唔係地下有一大堆石頭吸唔起，而係牆邊的灰塵、頭髮、梳化底，甚至肉眼睇唔到的細塵。而呢幾方面，4 Max 反而做咗更多針對性設計。
藍光顯塵：用完先發現原來屋企咁污糟
全效地板毛刷前方加入 180° 廣角藍光灰塵偵測。作用其實同近年部分高階吸塵器的顯塵燈差唔多，利用低角度光線將地上的微細灰塵照出嚟。尤其木地板或者淺色地磚，好多時你肉眼望落去覺得已經好乾淨，但一開燈照落去，就會突然發現：「原來仲有咁多塵？」官方標示藍光照明距離約 30cm，並聲稱可以令微塵視覺效果最高放大約 30 倍。呢類功能未必會令「吸力」本身變強，但實際打掃時幾有用，至少你會清楚知道邊個位置吸過、邊個位置仲未乾淨。
長頭髮人士應該會最有感：雙重防纏結
另一個版主幾鍾意的設計，就係防纏髮。如果屋企有長頭髮人士，相信一定明白，傳統電動滾刷用一段時間之後，成條滾刷基本上就會變成「頭髮捲」。之後你就要拎鉸剪慢慢剪。4 Max 的地板毛刷加入梳齒結構，滾刷轉動期間會將纏住的毛髮梳走；而迷你電動毛刷亦加入懸浮螺旋防纏結結構，主要針對床褥、梳化上的頭髮以及寵物毛。官方測試甚至用 200 條、每條 40cm 的長髮作測試，在指定條件下兩款電動毛刷的纏髮率為 0%。當然實際屋企環境唔會同實驗室完全一樣，但至少設計方向明顯係針對日常最令人煩躁的一個問題。自動模式其實比 Turbo 更實用
吸塵器提供 Eco、Auto 以及 Turbo 三種主要模式。一般人可能第一時間會覺得，買咗 280AW 當然長開最強模式先抵。但實際日常使用，版主反而覺得 Auto 自動模式先係比較合理。因為機身內置紅外線污垢感應器，可以實時判斷地面污糟程度，再自動調節吸力。灰塵少的地方就降低功率，遇到比較多垃圾或者灰塵的位置就自動加大吸力。一方面唔需要自己不停轉模式，另一方面亦可以慳返電，對無線吸塵器其實比「全程最大馬力」更加實際。
彎管設計：吸床底終於唔使成個人瞓低
另一個睇落好簡單，但用落應該會好實際的設計，就係中間條多角度彎管。平時吸床底、梳化底，傳統吸塵器最大問題就係條管係直的。結果要不是搬張梳化，就是自己個人彎到好低。4 Max 的彎管可以直接屈曲，主機保持較高位置，地板刷就可以伸入床底或者梳化底。對腰骨唔係咁好、又或者屋企本身有好多低身傢俬的人，呢個設計可能比多幾十 AW 吸力更加實際。
仲有一個寵物專用浮毛刷
如果屋企有貓有狗，今次仲有一個幾特別的浮毛刷。佢唔係單純用嚟吸地，而係可以一邊幫寵物梳毛，一邊直接將梳出來的浮毛吸走。長毛、短毛寵物都可以使用。對於平時一梳毛就成屋飛毛的人來講，至少理論上可以將毛髮未跌落地之前已經先處理一部分。最高 90 分鐘續航，但要睇清楚條件
續航方面，4 Max 內置一組 3750mAh 可拆式電池。官方標示最高續航可以去到 90 分鐘。不過呢度就一定要講清楚，因為「90 分鐘」並唔係駁住平時最常用的電動地板刷。使用全效地板顯塵毛刷或者迷你電動毛刷時：
Eco：約 60 分鐘
Auto：約 23 至 43 分鐘
Turbo：約 12 分鐘
而使用梳化刷、2 合 1 縫隙刷或者浮毛刷等非電動刷頭時，Eco 模式先可以做到最高約 90 分鐘。
所以如果大家平時主要係吸地，可以將「約 60 分鐘」視為比較有參考價值的最高續航數字，而唔係單純睇包裝上的 90 分鐘。好在電池本身可以拆換，如果日後有需要，理論上亦可以另外購買後備電池。
連吸塵器都可以駁米家 App
而家小米產品，當然少不了米家 App。4 Max 支援 Xiaomi HyperOS Connect，連接米家 App 之後，可以查看電池健康狀態、設定吸力、自動集塵、塵袋滿載提醒以及耗材更換提示。甚至可以同其他米家智能裝置聯動，例如吸完塵、放返入基座之後自動啟動空氣淨化器。
呢類功能就未必人人需要，但如果屋企本身已經有一堆米家產品，整合落同一個 App 始終方便。
8 重過濾，吸完唔係將微塵吹返出嚟
過濾方面，吸塵器主機有 5 重過濾，而集塵基座就有另外 3 重，合共形成 8 重過濾系統。其中包括 H14 HEPA 濾材，官方測試指，對 0.3 至 10μm 微粒的全機過濾效率最高達 99.99%。呢點其實都幾重要。吸塵器最怕就係前面吸咗啲塵，後面排氣又將微塵吹返出嚟，尤其屋企有小朋友、寵物或者對灰塵比較敏感，過濾系統其實同吸力一樣值得留意。
米家無線吸塵器 4 Max 香港售價 HK$2,499。如果純粹睇規格，280AW、27,000Pa、150,000rpm，全部都係幾搶眼的數字。但如果問版主今次覺得邊樣最吸引，我反而唔會答 280AW，而係自動集塵，因為吸力再強，吸完之後你都係要自己開塵盒、倒垃圾、清頭髮，其實每日使用體驗並冇真正改變好多。4 Max 今次由自動集塵、防纏髮、藍光顯塵，到可以屈曲吸床底的彎管，全部都係針對「每日打掃最麻煩嗰幾步」。
如果你屋企本身地方唔細、有長頭髮人士、有養寵物，或者你最憎每次吸完塵仲要慢慢清塵盒，呢類帶自動集塵基座的無線吸塵器，用落確實會舒服好多。