Physical AI 即係咩？
簡單講，以前 AI 主要係「睇資料再答你」，Physical AI 就係要令 AI 識睇現實世界，再控制機械人或者汽車做出實際動作。所以機械人要自己行、自己判斷前面有冇障礙、知道一件貨應該點樣拎，甚至汽車自己判斷路面情況，全部都可以算係 Physical AI。
NVIDIA 今次就將機械人開發分成模型訓練、模擬以及實際部署幾個部分，利用 DGX、RTX、Jetson，加上 Omniverse 數碼孿生平台，先喺虛擬世界訓練及測試，再將成果放落真正的機械人身上。
三星、SK 海力士連造晶片都用 AI
今次合作唔止係機械人。三星以及 SK 海力士亦會將 NVIDIA AI 技術用於半導體研發以及生產，例如利用 AI 模擬材料、晶片散熱以及製程。三星其中一項晶片熱力及機械分析，原本模擬一次大約要 18 小時，利用 NVIDIA PhysicsNeMo 之後，可以縮短至 41 秒。
兩間公司亦會利用 Omniverse 為晶圓廠建立數碼孿生，將工廠設備以及生產流程搬入虛擬世界，方便監察及模擬。
呢個方向其實幾值得留意，因為 AI 唔只係需要晶片，依家更加開始反過來用 AI 幫手設計同生產下一代晶片。
現代、LG 就真正落手做機械人
去到 Physical AI 最直接嗰部分，現代汽車會利用 NVIDIA Omniverse 以及 Isaac 平台訓練機械人，先喺數碼孿生工廠內學習，再正式落場工作。LG 的 CLOi 機械人亦會使用 NVIDIA Isaac GR00T 平台訓練，學習執取以及處理物件。整套流程包括收集現實數據、用 Cosmos 擴充數據、模型訓練，再放入模擬環境測試。
Kakao Mobility 就會將 NVIDIA Hyperion 以及安全驗證技術加入自家自動駕駛系統，目標係開發 Level 4 自動駕駛。
所以 NVIDIA 今次講 Physical AI，並唔係只展示一兩隻機械人，而係想由晶片、模型、模擬平台，一路做到真正落地。
NVIDIA 想做嘅其實係成個平台
睇完整場活動，最明顯一點係 NVIDIA 已經唔滿足於淨係賣 GPU。由三星、SK 海力士的晶片生產，到現代、LG 的機械人，再到 Kakao Mobility 的自動駕駛，NVIDIA 都想將自己的平台放入去。
韓國本身又剛好有半導體、汽車、手機、家電、電訊以及機械人等完整產業鏈，所以今次幾乎成個韓國科技產業都一齊落場。
AI 下一步真係會「行出嚟」
不過短期內大家又未需要幻想聽日就會有機械人返屋企幫你洗碗。今次公布的不少合作仍然係規劃或者測試階段，例如部分 AI 晶片系統要到 2028 年先正式部署，亦有項目仍然處於評估階段。但如果由大方向睇，訊號已經相當清楚。
之前 AI 競爭主要係鬥模型識唔識寫文、畫圖、答問題；而家下一步，就係開始鬥邊個可以令 AI 真正識得控制一部機器、識行、識睇、識做嘢。
之前親身睇機械人，感覺可能仲係「新奇」；但睇完今次 NVIDIA 拉埋三星、SK 海力士、現代、LG 一齊做，就會發現 Physical AI 已經開始由 Demo，慢慢走向真正產業化。