與 Google 共同研發！Now TV H1 支持 Google Assistant 語音控制功能
進入 Now TV 官網，按進「支援」，然後「機頂盒與遙控器」，再揀「機頂盒」，你並唔能夠搵到 Now H1 呢個型號，但偉大嘅 Google 幫到我搵到呢一頁出嚟，似乎係意外將呢一頁流出咗都唔定，應該係，除非唔係。今次邀請函強調係同 Google 共同研發，即係新呢款機頂盒，係會有 Google 嘅功能，而比較可能會用嘅，應該會係 Google Assistant，方便你透過語音，在 Now H1 進行一般 Google 搜尋及操控電視，例如: 轉台、開啟個人化專屬介面、播放影片等，並且可以將 Now H1 變身成智能家居裝置，可以呼叫 Google Assistant 開枱燈、調控場景等等。另外，在遙控器上亦都加入了 Google Assistant 的按鍵，可以一鍵使用語音控制，並支持英文同廣東話。
需連接 WiFi 使用 Google 其他服務
而根據「如何安裝 - Now H1」一頁其中一條問題所說：「你可以透過連接寬頻線，收看 Now TV 內容。但我們建議你同時連接 Wi-Fi 以享用 Now H1其他精彩功能，例如：下載各類電視應用程式、使用 Google 助理及 Google Play Store 等。」亦即是說，平時你睇 Now TV 嘅內容，直接連接佢專屬寬頻線就得，但如果要用埋 Google 嘅其他服務，就需要連 WiFi 先得。訂購光纖入屋 + 4K 計劃，觀看完整 4K 節目
另外，你可透過連接 Wi-Fi，收看個別已下載應用程式的 4K 內容。但若果你想觀看完整更高質素的 Now TV 4K 節目，你除咗需要選用 Now H1 之外，仲要選用「網上行光纖入屋」寬頻，並訂購 4K 計劃，咁就可以睇得到。而 Now H1 更兼容 HDCP1.1 HDMI 端口的 4K 超高清電視的電視/家庭影院系統。Now H1 內置數碼地面電視頻道播放功能，更輕易及更方便觀看本港免費數碼地面電視頻道。用Now H1 觀看 ViuTV 時，更可提供互動功能及自選服務。
內置 Netflix 等多個熱門影音程式，亦可在 Google Play Store 下載其他應用程式
同時，Now H1 內置多個熱門應用程式，包括 Netflix、黃藍 Viu、HBO Go 等等，亦可透過 Google Play Store 下載及安裝遊戲、音樂、電影等各類應用程式至機頂盒。不過內置的應用程式，則寫明不可以刪除。
至於收費方面，Now H1 月費為 $48，須簽約 24 個月。