外觀設計: 簡約實用，適合香港家居
先講 TCL C6K 55 吋型號，機身輕薄，重量只有 12kg 左右，一個人都搬得郁。邊框用上金屬拉絲紋理，跟機底座係 Y 形支架，穩定性好，唔會搖來搖去。駁絲位放喺機身右邊，有 4 個 HDMI (支援 eARC)、2 個 USB 以及光纖輸出，夠哂日常使用需要。相比起 C6K 55 吋型號，同場另外展示的 C7K 以及 C8K 75 吋型號，就相對大好多，其中 C7K 設計更精緻，邊框更窄，感覺好似畫框咁掛牆，底座支持左右旋轉，方便調整角度。而 C8K 75 吋屬於旗艦級數，機身最薄，而且邊框接近 0 cm，近乎真全屏幕的設計 (普遍電視都係會有條黑邊)，而後殼更用上碳纖維紋理，高級感十足。
三款電視機都支持 VESA 掛牆，香港蝸居用家唔使擔心空間問題，同時呢個系列屏幕反射處理都相當唔錯，就算光猛環境下畫面都唔會太刺眼。
▲ C6K 黑邊。
▲ C8K 黑邊。
畫質體驗：Mini LED 加持，顏色鮮豔黑色位深
講到電視機上手重點，當然唔少得係畫質，C6K 55 吋用 QD-Mini LED 面板，支援 144Hz 更新率以及 Dolby Vision HDR，顏色自然且黑色位深，唔會有光暈問題，適合喺黑房內睇戲。不過，細節位有時會爭咁少少，尤其快速動作場面下，未必及高階型號咁 Sharp。相比起 C6K 55 吋，C7K 75 吋就升級咗，亮度高達 1500 nits，HDR 效果更強，而且對比度相當不錯，畫面細節豐富，定位為中階旗艦。有人評價呢部電視為 2025 年嘅性價比之王，畫質動態明亮，適合日光環境。
C8K 更誇張，亮度高達 3000 nits，TCL 號稱更光的屏幕可以提供到更多細節，版主喺現場試咗 4K Demo，顏色層次超細，量子點技術令紅綠藍相當飽滿，飽和度對比起 C6K 和 C7K，完全係唔同嘅層次。整體嚟講，C8K 屏幕接近 OLED 嘅黑位，但亮度就相比 OLED 更勝一籌，同場比較，C6K 適合低預算用家，C7K 適合鍾意中規中矩嘅用家，而 C8K 則係追求極致嘅選擇。
▲ C5K 效果。
▲ C7K 效果。
▲ C8K 效果。
音質表現：Onkyo / B&O 加持，夠力但唔夠低音
音質方面，C6K 55 吋具有 Onkyo 加持，支持 Dolby Atmos 2.1 立體聲，總功率為 30W，能夠帶有少少空間感；C7K 同 C8K 就係同 B&O 聯手推出音響系統，其中 C7K 功率有 60W，低音更厚實，適合唔想額外購買音響嘅用家，而 C8K 就最豪華，功率有 80W，三個機型都內置低音炮，播音樂會很有現場感，而看電影嘅時候只要將音效設至「電影」模式，看 IMAX 電影例如《奇異博士》、《黑豹》時，可以有更澎湃、更逼真嘅感覺，但如果無設至「電影」模式，就感覺無咁強烈了。
總結三款 TCL C 系列電視機優點缺點
| 型號 | 優點 | 缺點 |
| C6K | 性價比高，畫質顏色好，黑位強，適合小家庭。 | 細節有時丟失，音質一般。 |
| C7K | 中階甜點，畫質動態，遊戲功能齊全，75 吋大芒值回票價。 | 反射處理唔及旗艦，但整體無大問題。 |
| C8K | 旗艦級亮度同對比，音質頂尖，適合愛睇戲嘅用家。 | 價錢較貴，但大尺寸值得。 |