第一印象：靚仔輕身，但戴得耐會「現形」
一拎上手，HTC VIVE Eagle 嘅外觀確實交到功課。成副眼鏡只係重 48.8g，同一般太陽眼鏡差唔多。有四隻顏色揀，除咗全黑，其他紅、啡、灰都係半透明設計，幾有科技感。鏡片由光學名廠 ZEISS 製造，保證咗遮光同視覺清晰度，不過我就自己喺深水埗一間眼鏡店，配咗有度數嘅漸變鏡片，唔係 ZEISS 鏡片，但日常用都好夠用。最值得讚係佢專為亞洲人設計嘅可調校鼻托，相比 Meta Ray-Ban 嘅固定鼻托，確實更貼面，冇咁易滑落。不過，戴耐咗問題就開始浮現。首先係重量分佈，眼鏡有少少頭重尾輕嘅感覺，主要原因係所有電子零件，包括電池、主板、鏡頭都集中喺鏡框前部同鏡腳前端。其次，左右鏡腳因為要塞入喇叭單元同電路，結構比較硬，冇得好似普通眼鏡咁輕鬆拗彎去貼合耳背。結果就係，副眼鏡唔係好「咬」得實個頭，行路或者郁動大啲，就好易鬆，成日要用手去托。戴超過一兩個鐘，耳背同鼻樑位置確實會有少少壓痛感。
▲ 包裝盒係圓筒形。
▲ 有眼鏡的圖案。
▲ 頂部有 VIVE 的 Logo。
▲ 底部有寫顏色同 size。
▲ 打開會有眼鏡盒同埋叉電線。
▲ 充電係用磁吸式設計。
▲ 眼鏡盒都算靚靚仔仔。
▲ 會送 $500 溥儀禮券。
▲ 內有說明書。
▲ 耳仔位置唔能夠調校，變相要自行購買一些眼鏡用嘅耳套，先可以唔容易滑落嚟，但有時會戴到耳痛鼻痛。
核心體驗：一鍵拍攝好爽，但語音限制多
呢類眼鏡最大賣點，就係解放雙手，隨時記錄。VIVE Eagle 喺右鏡腳上面設有一個實體拍攝鍵，撳一下就影相，長按就開始錄影，反應爽快，的確方便。畫質方面，搭載咗一顆 1200 萬像素超廣角鏡頭，影出嚟嘅相片色彩偏向自然，有外媒實測甚至覺得成像有種「日系」清淡風味。錄影方面支援 1080p@30fps，足夠記錄生活片段。語音指令「Hey VIVE，拍照」一樣 work，雙手都拎住嘢時好有用。但影相有個重要設計限制：為保障私隱，鏡框右內側設有提示 LED 燈，當你影相或錄影時，粒燈會著，提醒身邊嘅人。而呢個燈如果被遮住（例如唔小心用手指掂到，或者擺入袋時被布料蓋住），所有影相錄影功能會即時被強制停止。呢個設計原意良好，但實際使用時就要特別留意。
另一個大問題係語音支援。VIVE Eagle 嘅 AI 功能，包括問天氣、設提醒、翻譯，都係靠語音驅動。可惜嘅係，目前 AI 只辨識普通話同英文指令，完全唔支援廣東話。對於香港用家嚟講，要用一口流利普通話同副眼鏡溝通，實在係一大門檻，令語音功能嘅便利性大打折扣。
AI 與音效：功能強但漏音扣分
AI 智能係 VIVE Eagle 另一重點。佢內置 HTC 自家 AI，並可以連接 Google Gemini，俾用家選擇。最實用係即時翻譯功能，鏡頭對住外文餐牌或路牌，好快就可以用語音讀出中文意思，支援多達 13 種語言，去旅行好幫手。所有資料處理同儲存都喺眼鏡本機進行，強調私隱保護，唔會上傳雲端。至於聽歌同通話，眼鏡腳設有開放式立體聲喇叭，好處係戴住都聽到環境聲，行街安全。音質以咁細單元嚟講算唔錯，通話收音用咗四咪高峰陣列，對方都聽得清晰。然而，官方雖然宣傳有防漏音技術，但實際使用時，在安靜環境下（例如辦公室、圖書館），身旁嘅人依然會隱約聽到你眼鏡傳出嘅音樂或通話聲，漏音情況仍然存在。如果你想完全私人嘅聆聽體驗，呢點需要考慮。
續航與充電：一日一充走唔甩
續航力方面，官方數據係連續播歌可用 4.5 小時，待機時間長達 36 小時。實際用落，如果間中影下相、問下 AI、聽一兩粒鐘歌，勉強可以撐到一日工作時間。充電係磁吸式設計，快充10分鐘可以回血 50%，算係幾方便。小結
總括嚟講，HTC VIVE Eagle 係一副將大量科技塞入時尚外形嘅野心之作。佢嘅優點好明顯：一鍵拍攝錄影真係方便、AI翻譯功能實用、專為亞洲人調整的鼻托設計亦見心思。但佢嘅缺點亦相當具體：佩戴感未如理想，頭重尾輕同鏡腳過硬導致易鬆同易累；完全欠缺廣東話支援，對香港用家極唔友好 (不過據聞二月左右會有支援廣東話)；音樂仍有漏音；以及私隱燈被遮蓋會強制停止拍攝嘅限制。
如果你係科技愛好者，經常需要雙手處理其他工作，但又想同時記錄眼前畫面（例如維修、煮食、旅行），而且能接受用普通話下指令，咁 VIVE Eagle 能提供獨特嘅便利。但如果你追求完美舒適嘅佩戴體驗、完全私密嘅音訊，或者純粹因為唔擅長普通話，咁呢副眼鏡當前嘅缺點可能會蓋過佢嘅優點。