旺角 GALA CINEMA 戲院新革命！引入 CINITY LED 全新系統，全港獨家 4K 3D 48fps《阿凡達3》

左定坤 (Cho Ting Kwan) 2026-01-08 14:49 | 數碼影音

講到入戲院睇《阿凡達》，大家第一時間諗起嘅，可能都係 IMAX 3D 或者 4DX。無嘅，占士金馬倫呢個系列，從來都係挑戰緊電影技術嘅極限，唔用最高規格去睇，好似嘥咗佢啲心機。不過，呢個觀念可能今日要改變一下喇！因為香港百老匯院線旗下嘅 GALA CINEMA（朗豪坊），啱啱引入咗一套叫做 CINITY LED 嘅全新放映系統，仲要成為全港唯一可以睇到 《阿凡達 3》4K 3D 48fps 高幀率版本嘅戲院。想知詳情，睇下文啦！

戲院技術新玩家：CINITY LED 登陸旺角核心影廳

今次嘅主角，係嚟自中國中影科技旗下嘅高格式電影品牌 CINITY。佢哋唔係用傳統投影機打落塊幕度，而係直接用上一整塊巨型嘅自發光 LED 屏幕做影院銀幕。GALA CINEMA（朗豪坊）引入嘅係 10 米闊嘅型號，裝咗喺院內有 197 個座位嘅 5 號院。即係話，你入到去，成塊牆就係一個巨大嘅 LED 電視，冇傳統投影嘅光衰問題，亦都冇銀幕嘅紋理阻礙。

咁佢有幾巴閉？第一，佢係全球首批通過 Digital Cinema Initiatives (DCI) 最新 HDR 標準認證嘅影院放映系統，簡單講就係「持牌」嘅影院級超高動態範圍技術。第二，佢係目前市場上唯一可以同時結合 4K 解像度、3D、最高 120fps 高幀率同超高對比度嘅技術架構。

今次《阿凡達 3》就會用全港獨家嘅 4K 3D 48fps 版本上映，對於追求流暢動態畫面嘅觀眾嚟講，吸引力十足。連導演占士金馬倫都親口肯定，話 CINITY LED 嘅亮度、對比度同聲效，同《阿凡達3》係「天衣無縫」。音效方面，影廳同時配備咗杜比全景聲 (Dolby Atmos)，視聽體驗一次過滿足晒。