搶眼科幻外型，實體操作手感極佳
首先講下外觀，Headphone (a) 延續咗 Nothing 標誌性嘅透明、科幻設計語言。除咗經典嘅黑白兩色，今次仲加入咗粉紅色，同埋限量版嘅黃色，玩味極濃。重量方面，佢比上一代輕巧，大約係 310g。戴上頭嘅感覺，耳墊算係柔軟舒服。不過，佢嘅尺寸調校位置設喺頭帶頂部，而唔係耳罩兩側，微調起上嚟未必夠方便。另外，佢嘅夾頭感（Clamping force）有少少偏緊，雖然對隔音有幫助，但如果頭型較大，長時間戴住可能會覺得有啲夾。操作方面就真係要大讚！佢放棄咗觸控，改為實體按鍵、撥桿同埋一個用嚟調校音量嘅滾輪。呢套實體操作極具觸感，手感非常好，比起好多觸控設計實用同直觀好多。
音質偏重低音，降噪表現交足功課
音質方面，Headphone (a) 嘅調音明顯偏向大眾口味，主打強勁嘅低音表現。音場廣闊，聽落非常有活力同能量感，用嚟聽重節拍嘅音樂簡直一流。不過，比起高階嘅 Headphone (1)，佢嘅中頻就略嫌唔夠通透。喺處理一啲樂器較複雜嘅歌曲時，中頻會顯得有啲混濁同擠擁。好在佢個專屬 App 提供咗非常實用嘅 Parametric EQ（參數化均衡器），大家可以慢慢調校返自己鍾意嘅聲音，甚至可以分享 Preset。至於主動降噪（ANC），佢表現算係交足功課。搭車或者喺辦公室用，大約可以平均隔絕到 83% 嘅環境噪音。雖然未去到市面上最頂級嘅降噪水平，但日常使用絕對夠做。
