唔再淨係試兩聲道 今次主攻家庭娛樂
香港其實一直都有唔少 Hi-Fi 展，但以往好多活動都比較集中兩聲道音響或者 Head-Fi。對於普通用家來講，如果想睇新電視、試 Soundbar，或者想知道一套完整家庭影院實際效果可以有幾大分別，反而未必有好多機會可以一次過比較。今次 HAVF 的定位就明顯唔同，主題係 「家庭娛樂｜從『新』出發」，主力針對電影、劇集、打機以及家庭影院用家，希望將電視、投影、Soundbar、主動式音響等產品一次過集中展示。
而 11 月舉行其實時間都幾啱，距離聖誕、新年唔遠，如果本身已經打算年尾換電視或者升級屋企影音設備，就可以先去現場睇真機、試效果，再決定買邊套。
LG、Sony 都有大型影音示範
今次其中一個重點，當然係電視。現場的大型影音示範區會有 LG 以及 Sony 參展，而展示範圍就包括 4K 電視以及不同新一代顯示技術。新聞稿提到的產品類型包括 OLED、True RGB、Mini RGB LED、Micro RGB LED，另外亦會有投影機產品。其實電視呢樣嘢，版主一直都覺得真係唔可以單睇 Spec。尤其近年大家又講 OLED，又講 Mini LED、RGB LED，各家峰值亮度、分區數量睇落愈來愈誇張，但去到真正睇電影、HDR、暗位表現，以至普通電視節目時，實際效果未必可以單靠一張規格表判斷。所以如果可以將幾種顯示技術放埋一齊睇，反而會比上網睇評測更加直接。
Bose、KEF、Focal 等品牌都有 AV 示範房
聲音方面就更加多品牌。專業 AV 示範房包括：AWOL、Bose、Cambridge、KEF、ECT、P&O Hi-Fi 以及 Soundwave Audio Limited。當中 ECT 會重點示範 Acrolink、LAiV、QED、OLADRA；P&O Hi-Fi 就有 Anthem、PERLISTEN；Soundwave Audio Limited 就包括 Kojo Technology 以及 Focal。今次亦唔係單純擺部喇叭喺枱面俾你望。場內會設有獨立影音示範房，可以實際體驗 Soundbar、主動式音響以及完整家庭影院組合。
對於想由「電視內置喇叭」升級出去，但又唔知究竟應該買 Soundbar、2.1、5.1 定係再玩大啲的人，呢類實際試聽其實幾有參考價值。
耳機、DAP 都照顧到
雖然今次主題係家庭視聽，但 Head-Fi 玩家都唔會完全冇嘢睇。展銷區仲會有 DMA 泛音、HK68、Let’s Go Audio、evosound、Crystal Sound Audio 等參展商。品牌就包括 64 Audio、HiFiMan、Astell & Kern、iFi Audio、Audio-Technica、FiiO、Sennheiser、Shure、Meze Audio、Acoustune 等。所以就算本身唔打算玩成套家庭影院，淨係想試下新耳機、DAP 或者 Head-Fi 產品，其實都仲有嘢睇。最大賣點始終係「可以即場試」
其實近年買電視同影音產品有一個幾麻煩的地方，就係網上資料愈來愈多，但真正有機會同場比較反而愈來愈少。尤其 Soundbar、喇叭以及家庭影院，睇 YouTube 評測始終都唔可能完全聽到真實效果。今次主辦單位就明顯想將「實際體驗」放返做重點，透過獨立示範房以及現場展示，等用家實際睇、實際聽，再比較不同產品的分別。HAVF 視聽娛樂祭 2026 活動資料
活動名稱： HAVF 視聽娛樂祭 2026日期： 2026 年 11 月 6 日至 7 日
11 月 6 日： 上午 10 時至晚上 7 時
11 月 7 日： 上午 10 時至晚上 6 時
地點： 九龍塘創新中心 InnoCentre
交通： 港鐵九龍塘站步行可達
入場費： 免費
入場方式： 預先或即場填寫 Google Form 登記
現場設有大型影音示範區、多間專業 AV 示範房以及開放式旗艦展銷區。