唔係筆電，係可摺疊「鍵盤工作站」！
Keebmon 嘅設計概念，的確同傳統筆記簿電腦完全唔同。與其話佢係一部有鍵盤嘅電腦，不如話佢係一個自帶完整電腦主機嘅機械鍵盤。佢嘅本體就係一個全尺寸機械鍵盤，上面「摺埋」咗一塊 13.3 吋嘅超寬比例觸控螢幕。用嘅時候打開個螢幕，就係一個自帶主機嘅一體式工作站；唔用嘅時候合埋，就變成一個只係略厚嘅機械鍵盤，可以直接掉入背囊。團隊嘅目的好明確，就係要打破工作同地點嘅綑綁，等程式員、設計師甚至遊戲玩家，可以隨時隨地都有最完整（包括最佳鍵盤手感）嘅高效能體驗。瘋狂規格：一部藏喺鍵盤裡嘅頂級PC
Keebmon 之所以咁有信心，全因為佢落足重本嘅硬件。效能核心用上 AMD 最新嘅 Ryzen AI 9 HX 370 處理器，整合強大 NPU，針對 AI 運算、3D 渲染同高效能多工作業，用家可以按需要將配置推到最高 64GB DDR5 RAM 同 8TB PCIe 4.0 SSD，呢個配置喺傳統 Notebook 上都屬於頂級。作為命名來源，佢嘅鍵盤先係靈魂所在，採用 Kailh Low-profile Choc V2 矮軸，並且係熱插拔設計，意味住你可以自由更換唔同手感嘅軸體同鍵帽，甚至重新設定每個鍵嘅功能，對打字手感有要求嘅用家來講，係最大賣點。互動方面配備 13.3 吋 10 點觸控超寬螢幕，支援手寫筆操作，團隊強調可以完全「Mouse-less」操作，依賴多點觸控手勢，好明顯係想融合平板嘅直覺操作同 PC 嘅生產力。擴展性亦相當不錯，機身設有齊全 I/O 接口，最特別係提供一個 OCuLink 接口，可以用來連接外置顯示卡（eGPU），將圖像處理能力推向極致，另外亦內置 LTE 上網支援同最新 Wi-Fi 7，確保流動連接。
眾籌價抵玩？超高性價比背後的考慮
目前項目正進行眾籌，最吸引係 「Super Early Bird」超早鳥優惠，只需港幣 $3,104（約 $399 美元），就可以獲得搭載 Ryzen AI 9 HX 370 嘅基礎版本（注意：此價格不包括 RAM 及 SSD，需額外加購），送去香港要另外加 $600，即 $3704。以呢個規格嘅「全功能PC」來講，價錢極具競爭力。當然，眾籌產品必然有風險。團隊預計 2026 年 4 月 才開始出貨，等待期相當長。而且，將高性能硬件塞入如此緊湊嘅鍵盤機身，散熱表現同實際續航力，一定要等實物出爐先有真正答案。項目由知名眾籌推廣公司 Jellop 協助，雖然增加咗成功機會，但 backers 仍需自行評估延期或產品未達預期嘅風險。老實講，Keebmon 唔係一部適合所有人嘅設備。對於一般文書用家，佢可能太複雜、太貴。但對於一類特定族群——例如追求極致鍵盤手感嘅流動程式員、需要手繪同時要跑專業軟件嘅設計師，或者係成日出差但又想打機嘅玩家——Keebmon 提出嘅「All-in-One」方案，確實直擊痛點。佢嘗試解決嘅，正正係「高效能」與「輸入體驗」在移動場景下難以兼得嘅矛盾。$3,104 超早鳥價，買一部未來可能改變工作模式嘅概念產品，搏唔搏得過？網友又點睇呢？
來源: Kickstarter