Xbox One 大更新：全新界面、啟動更快! 可兼容 Xbox 360 遊戲!

左定坤 (Cho Ting Kwan) 2015-11-20 20:22 | 遊戲電玩

Xbox One 自 2013 年已經公開發表左，但一直以來微軟都堅持唔向後兼容 Xbox 360 遊戲。不過 Xbox One 嘅銷量未有預期咁好，好多玩家都被 Sony PlayStation 4 吸引而過檔。而虎仔早喺 6 月的時候就已經同大家提及過微軟宣佈 Xbox One 將會兼容 Xbox 360 遊戲，但宣佈完之後一直都未有行動。最近，微軟終於對 Xbox One 進行大更新，除左界面上有改變、啟動更快之外，亦如之前所說可兼容 Xbox 360 遊戲。



重點更新001: 首頁界面更方便
全新的首頁界面可以利用左右來選擇不同的內容，包括遊戲、社群、市集等，而利用上下可以選擇更多的相關內容，至於 LT 同埋 RT 可以快速上下捲動，加快瀏覽速度。另外，Xbox One 的主頁將會以遊戲為主，包括最近玩過嘅遊戲等等，以便掌握遊戲的新資料。



重點更新002：更快啟動常用功能
只要在主頁按左或者在遊戲中連按兩次 Xbox 鍵，就能開啟 Guide 選頁。在 Guide 頁面中，你可以更快查看到你嘅朋友係度玩緊乜、邀請朋友一齊玩、send 訊息以及睇通知。

重點更新003：兼容 Xbox 360 遊戲
更新之後，用家可以唔洗再俾錢就可以玩到 Xbox 360 嘅遊戲。目前有超過 100 款嘅遊戲可以玩到，未來將會有更多的遊戲陸續加入。喺 Xbox One 上玩 Xbox 360 遊戲，唔單止可以用盡 Xbox 360 嘅功能，包括同 Xbox 360 玩家對戰、發訊息等，仲可以用到 Xbox One 特有嘅功能，例如用 Game DVR 拍攝遊戲片段，甚至仲可以串流遊戲到 Windows 10 電腦，可以話係一部 Xbox One，可以用盡兩部機嘅功能。



重點更新004: 新增 Xbox Accessories Apps
更新左 Xbox One 之後，會發現新增左一隻 Xbox Accessories Apps。透過呢隻 Apps，你可以將手掣的所有按鍵自由調換，而且仲可以自由設定背後的 4 個按板鍵，以利用其他手指協助控制，加快反應速度。系統為用家預留左 255 個儲存位置，方便你玩唔同嘅遊戲就切換唔同的設定。

其實而家仲多唔多人玩 Xbox 架呢? 還是啲人通常都會玩 PlayStation 嘅 Game 多? 因為版主自己本身好少會打機，不過平時聽得人地講 PlayStation 多，但好少有人講 Xbox。不過點都好啦! 如果你平時係玩開 Xbox One 嘅話，唔知今次呢個大更新，能唔能夠吸引到你呢?