Apple SIM 大敵! 日本上網實測 AIRSim 首張百變 Cloud SIM 旅遊數據卡

Wilson Li 2017-03-20 19:25 | 網絡消息
唔知大家仲記唔記得之前版主 Keith 介紹過 Apple SIM:iPad 用家買咗佢,就可以一張 SIM 係世界唔同地方,買上網數據。但有別其他 Apple 產品,出咗之後,無人提亦無人用,相信同收費偏貴好關!版主最近送了一張 AIRsim 俾小弟,呢張可以話係 Apple SIM 變種,但係 iPhone 與  Android 手機都用到!版主 Keith 說,呢張 AIRSim 與 Apple SIM 都係用了 Cloud SIM 技術,可以隨時變身不同嘅漫遊 SIM 甚至當地 SIM 卡!  我係日本用過,佢就變身透過中國聯通香港使用 SoftBank 4G 網絡!想知道幾錢與好唔好用?齊齊睇! 

fb-travel.jpg

Cloud SIM 新技術,更勝 Apple SIM
呢張 AirSim 真係推出左無耐,係之前 ePrice 版主們年推嘅「華龍 4G 年卡」同一間公司嘅信京電訊推出的,仲要好低調咁推出,要買嘅話,要去信京電訊銅鑼灣門市或者去  airsim 官訂先得,我就帶左去日本用左七日。

版主 Keith 去之前,同我介紹過呢張 SIM 卡原理,聽了之後,原來操作都幾有趣! 你買嘅時候,其實係一張普通 nano SIM 卡 (三重卡,可作為 microSIM),你可以直插去 Android 手機或者 iPhone!要 AIRSim 真係操作得到上到網,你要配合專用嘅 App,係 Google Play 與 iTunes 都有,App 名就係 AIRSim Roam (按入有連結),你要係 App 加入 SIM 卡 ICCID (SIM 卡套上面有寫的),咁信京 Server 就會認到你張 SIM 提供服務。要你張 SIM 上到網,當然你要增值,係 App 裡面可以處理,用信用卡俾錢就可以,再唔係去7-11 買信京增值券就可以。AIRSim 收費模式有兩種,一個係唔開 Package,按地區每日收費。另有 Package 選擇,可能是計一個地區日數,或者係幾個地區合拼計算,App 上面有齊收費,你可以慢慢揀。若果你忘了揀 Package,只要你張 AIRSim 有足夠面值,就會自動用日費計算。

AIRSim 操作有點特別,佢會先 Log 入 3 香港及其漫遊網絡,有乜用呢?原來係作初部嘅定位,等信京方面,知道 Login 左邊個地區嘅網絡,呢部份係唔會收你錢。之後,你會發覺手機會顯示收不到網絡,大多數 Android 與 iPhone 都會再 Log 入你已選擇嘅 Package 嘅網絡,而 APN 亦會自動設定。這就是 Cloud SIM 技術,係雲端幫你張 SIM 變身不同地方嘅 SIM 卡。

Cloud SIM 技術有乜好處,或者 AIRSim 用 Cloud SIM 有乜好處?原來京信可以揀選收得最好,收得最平嘅網絡,供大家選擇,例如中國大陸 AIRSim 會用 CMHK 漫遊中國移動,好處係可以中國大陸最好嘅 4G 網絡外,更可以用到 Google 與 Facebook。但去到台灣,又會變身當地 SIM 卡,用上台灣之星或遠傳,享用當地嘅 Package。而 AIRsim 係唔用情況下,可以 Keep 一年,一年內,信京可以不停揀最好嘅網絡商,令大家用得更開心。

 

螢幕快照 2017-03-20 下午7.18.27.png
▲  AIRSIM 網站已有齊不同地區上網數據收費。

  1日 3日 5日 7日
中國大陸 $30 $78 $128 $178
澳門 $20 $30 $48 NIL
台灣 $20 $30 $50 $70
泰國 $20 $30 $50 $70
日本 $30 $68 $98 $126
南韓 $30 $68 $98 $126
新加坡 $20 $30 $50 $70
馬來西亞 $20 $30 $50 $70
香港 $20 $30 $50 $70
▲ AIRsim 係 2017 年 4 月的部份漫遊數據收費,這是一個地區計算,亦有一些是幾個國家一起計算,如歐洲 34 國、亞洲 11 個套餐,全部以港元計算。除了一日套餐是以開啟後廿四小時計算,其餘計劃以香港時間凌晨零時為重新計劃時限。每日可用 500MB (香港 1GB),之後限速 256kbps 無限上網。


真實體驗

今次我就用大家最關心嘅日本做測試啦! AIRsim 係日本選用中國聯通香港漫遊當地 Softbank 4G LTE 作網絡,價錢方面,我選擇了 HK$98/5日,一日首 500MB 是 4G LTE ,過左後就會跌左去 256Kbps。呢個價錢,唔係特別平,唔係特別貴,之前版主 Keith 介紹過 AIS 泰國神卡,8 日 3GB 同様用 Softbank 也不過賣 $90 ,不過正常用途唔係點睇片其實一日用 500MB 係好足夠,至少我喺到都無一日爆 Data嘅。而我覺得,AirSim 可以事前喺 App 上購買數據套餐,設定開始嘅日子,落到地換返張 AirSim 就可以上網,張卡可以多次使用,目前都有超過50國家都可以使用到 AirSim,啱曬我地呢班大忙人。


Setting 容易


IMAG0051.jpg
▲論 Setting 黎講已經係嬴左好多張卡,通常去到外地,以日本為例,你要落地後跟說明書設定複雜嘅 APN,甚至 iPhone 用戶要搵返機場 WiFi 然後 download 個 file 落黎先可以上到網,成件事感覺麻煩,但用 AirSim 只係落地開返漫遊,然後 APN 設定打返 3gnet,然後佢就由沒有服務轉到當地嘅電訊商就已經上到網。

速度

先講下呢張卡先,由於呢張係漫遊Sim黎嘅,細心咁睇你從佢嘅 APN 見到係使用緊中聯通嘅 APN setting ,意味住所有 Data 都要經過香港 Server 先回到用家手上,所以使用左日本嘅 Speedtest Sever 就發現速度奇低(只有不足 1Mbps 嘅下載),相反我利用香港嘅 OFCA Speedtest app 就發現可以去到 25Mbps 嘅速度。以日本 4G LTE 速度來說,好收貨。

IMAG0058.jpg
▲當初用 Speedtest 用左日本 server 黎測速發現真係有點慢,但使用嗰陣唔覺只有不足1Mbps速度上網,後黎再試下用香港嘅 OFCA 測速,竟然有另一番成績。


IMAG0126.jpg
▲夜晚11點嘅新宿站,下載速度為9.31Mbps,上載速度為10Mbps,延遲為305ms,測速Apps為 OFCA Spee dtest。

IMAG0120.jpg
▲下午嘅河口湖,下載速度為17.3Mbps,上載速度為9.2Mbps,延遲為309ms,測速Apps為 Ofca 

IMAG0148.jpg
▲回到東京住宿地方嘅室內,下載速度為23.5Mbps,上載速度為6.66Mbps,延遲為312ms,測速Apps為 Ofca 


IMAG0136.jpg
▲呢張卡係日本其實用上中國聯通漫遊卡,所以可以喺外地睇地需要香港 IP 嘅 ViuTV,如果你旅行需要追劇的話可以用呢張卡去睇下,睇爆左 500MB 點算?都有 256kbps 速度,用來 keep 住 WhatsApp、Facebook、簡單 Email 與 Google Map 都無問題嘅。 

IMAG0062.jpg
▲睇 Facebook HD片絕對無問題,一路順暢無停過。

IMAG0157.jpg
▲坐住山手線睇 FB 直播選舉論壇直播又得,仲要一路順暢好清。

IMAG0149.jpg
▲此外,更支援 Tethering,需要時可以 Share WiFi 俾自己部電腦或 iPad 上網又得,不過速度未必係最快,同埋一日只有500MB Data(日本Plan),所以要留意住 Data 黎上網。


總結

講到明先,呢張卡入面嘅 Plan 未必係最平嘅選擇,你要做到最平就麻煩去鴨記搵,但如果你係呢類人
  1. 快閃遊(快到夜晚book機票聽日飛連卡都唔知有無時間買)
  2. 商務客(一年成日飛又唔想煩買卡)
  3. 一次旅行去幾個地方
其實呢張卡對你黎講係唔錯嘅選擇,都唔洗次次飛之前都要煩旅行用嘅電話卡,拎返張 AIRSim 入去上網選擇返上網Plan都得添,仲有部分地區有24小時Plan俾到你去選擇,適合快閃遊/轉機遊嘅網友選擇。

更多資料:Airsim

最新新聞