中移動大舉清貨， LG G Flex 2 兩千有找，算唔算抵？
對上一次分享首部 S810 手機 LG G Flex 2 的消息已經係上月頭百老匯做減價清貨的時候，價錢就係 $2540 ，算係一個相當吸引的價錢。近日中移動看來都有意將 G Flex 2 清貨，除左現時的中移動客戶可以用 $1980 呢個價錢買淨機而不用加簽之外，非中移動客戶上台選任何數據用量計劃都可以出到機，換句話講每月月費 $106 的 Lite Data 服務計劃都可以。 ＄1980 呢個價位而家係先達都可以買到水貨版的 G Flex 2 ，但係要有中文版的話都要 ＄2100 左右。所以對於現時中移動的客戶來講， G Flex 2 可以話係最平 S810 手機啊！
▲ 仍記得有網友提過如果兩千有找可以玩到 G Flex 2 行貨會入一部，唔知今次中移動清貨價又算抵唔抵呢？
▲ 場內 G Flex 2 最平一樣係 $1980 。
3GB RAM 兼有金屬機身， HTC One M9 同樣要清貨，性價比更高？
講到明不止有 G Flex 2 ，今次當然有另一部 S810 旗艦都要清貨啦，呢部同 G Flex 2 一樣減價減不停的 HTC One M9 同 G Flex 2 可以話難兄難弟，一推出後用家反應都不算很正面，連帶銷情不算出色，需要不斷減價去刺激買氣。以大廠旗艦來計 One M9 的跌勢明顯比較強勁，係 7 月中已經跌左兩千，上星期係大鋪亦再有減價，落到 $3598 呢個中階機價位，雖然未致於好似 G Flex 2 咁有大鋪趕住清貨，但中移動都將呢部 HTC 2015 年首部旗艦用新低價促鋪。而家中移動的「客戶機價」以及上台價都只係 ＄2480 ，比起大鋪價錢平多一千！版主有問過如果新上台選用更貴的月費計劃會不會減得更多，但答案係機價一樣不會變，所以如果想用最少的金額出 One M9 的話都會係 Lite Data Plan 最抵的。另外要留意就係今次之所以叫清貨除左係因為價錢平一截之外，更加係因為已經有不少人反映有中移動分店已經無貨，所以如果大家睇岩的話，手腳都要快了。最後再加入先達場內價錢作為參考，現時 One M9 係場內價錢同大鋪價其實相距好細，場內行貨都仍然要 $3400 左右，而水貨比較平的都要 $3180 ，所以如果以價錢來計 LG G Flex 2 係會比較平，但係從性價比來講或許 HTC One M9 會更吸引呢！唔知大家又點睇今次中移動的優惠呢？不妨留言講講啦！
▲ 版主雖然覺得 One M9 使用體驗不算很好，但呢個價錢⋯⋯不得不承認真係好抵玩
▲ One M9 雖然係大鋪跌勢強勁，但係場價卻企得相當硬。
在文章發佈的時候， G Flex 2 賣價為 $2540 ，按此看詳細規格及最新賣價。
在文章發佈的時侯， HTC One M9 賣價為 $3,598，按此看詳細規格和最新賣價。