主題:試玩 Sony Playstation VR | 跟 HTC VIVE 比拼

  • 發表時間:2016-07-28 19:31 收錄檢舉
    早前 Sony 在美國 E3 發佈會上發佈左 Sony Playstation VR(下稱 Sony VR),已經係香港可以 Pre Order,小弟呢幾日就機會去體驗一下  Sony VR,呢個係小弟繼 HTC VIVE 之外,另一個玩過嘅 VR 技術。雖然前幾日蘋果日報都特登開左 Facebook Live,去直播政界名人點樣玩  Sony VR,不過應該從直播只係睇到佢地點玩,但到底玩嘅感覺係點,小弟就為大家試玩下,同大家講下第一手試玩嘅感受。

    試玩 Sony Playstation VR | 跟 HTC VIVE 比拼

    網友可能會問我到底  Sony Playstation VR 同 HTC VIVE 嘅分別喺邊,我首先從硬件上講下分別,大家同樣都係使用 OLED 屏幕,而且解像度則 HTC VIVE 相對  Sony VR 為高,前者為解像度為 2160 x 1200,後者只有 1920x1080;而視角 HTV Vive 有110度, Sony VR只有 100 度,而且到目前為止 Steam 上有超過 100款遊戲支援 HTC VIVE,而 Sony 因為未賣街嘅關係未知有幾多,但承諾年底會有超過 50 款遊戲。正所謂一分錢一分貨,Sony VR 喺硬件上弱過 HTV Vive,只賣港幣 3199 ,而HTV Vive 需要港幣 8199,同時 HTC VIVE 硬件需求是 Intel Core i5 CPU+Nvidia GTX 970 效能嘅電腦,而 Sony VR 只需一部 PS4,相對黎講 Sony VR 係較為經濟,而 HTC VIVE 則是豪華享受。

    操作方面,大家都有個眼罩,而且都係有 2 支手掣,不過 2 支手掣各自都有唔同嘅技術,而 VR 遊戲除左畫質體驗之外,若手掣有好大嘅延遲,都會影響到玩家嘅體驗。據資料顯示 HTC VIVE 係使用左 Lighthouse 定位技術,透過激光和光敏傳感器喺對角下形成一個長方形區域,而透過激光去計算出用家嘅活動;相反 Sony VR 仲用緊 2010年推出嘅 PS Move,呢件野都係為 PS3 而推出,靠嘅係靠雙鏡頭黎追蹤手掣。先唔好講咁多住,體驗先係最重要。

    試玩 Sony Playstation VR | 跟 HTC VIVE 比拼
    ​▲呢個就係 Sony Playstation VR 整體嘅裝備,有傳統嘅 PS4 手制、PS Move 同埋一個 VR 射擊器,當然最重要就係 PS4 主機,只要有 PS4 主機就可以玩到啦,但同時在記者會上有記者問到 Sony 會唔會未來研發一部專為 VR 嘅主機,而 Sony 承認研發緊新嘅 PS 主機更好對應 PS VR。

    第一個遊戲係 Battle Zone,玩家就係坐喺一個坦克車上,利用槍或炮去打倒敵人,而操控方式就係傳統嘅手制,無錯真係手制,對我呢 D 習慣操控槍槍炮炮嘅人黎講係有點不習慣,不過可以嘅就係坐定定喺到打,如果喺屋企真係可以戴住個  VR 眼罩咁玩成日(如果唔頭暈眼花),雖然 Sony VR 畫質係差過 HTC VIVE,但我都係覺得尚可接受嘅範圍,但遊戲嘅玩味性就麻麻。


    ▲呢個係我玩 Battle Zone 嘅片段。

    第二個遊戲係 Ace Banana,呢隻遊戲就相對益智好多,故事情節就係一個弓箭手守護香蕉,唔好俾班馬騮走黎,同埋終於可以玩下嗰兩個 PS move 手掣啦。揸上手嘅感覺係唔錯嘅(始終都係預左俾人拎黎玩),而且都係可以真係去郁下運動下。講真,玩完隻手真係好攰,成日都係喺到拉弓嘅動作,有時當多馬騮嘅時候就要急速地係咁射,嗰下真係好攰......但係可以有 D 運動係一個好事黎嘅,始終 VR 都係要有返 D 運動先叫做VR。


    ​▲呢個係我玩 Ace Banana 嘅片段。

    第二個遊戲名叫 Farpoint,係一個槍戰遊戲黎嘅,而且在記者會上,Sony SIE Asia 副總裁 Hiroyuki Oda 先生親自上陣表演試玩 Farpoint,而且有別唔同其他嘅 VR game 就係佢可以玩到 VR 射擊器,VR射擊器點用呢 ? 睇片啦,講真佢真係做到好似有真實嘅步槍咁樣,喺遊戲入面到殺人,其實都幾好玩下架,而且有野走黎都會嚇到一嚇嘅,畫面迫真呢下已經好重要。其實射擊手掣都真實過 HTC VIVE 嗰兩個手掣,如果兩邊可以融入咁黎打 War Game 就好了。不過另一樣野就係佢嘅前進同閃避唔係依賴人嘅動作,而係用手制按鍵移動,呢一樣野無 HTC VIVE 嘅 Front Defense 真實咁好玩。

    試玩 Sony Playstation VR | 跟 HTC VIVE 比拼
    ▲Sony SIE Asia 副總裁 Hiroyuki Oda 先生親自試玩。


    ▲呢個係我玩 Farpoint 嘅片段。
     

    總結

    你問我點睇 Sony Playstation VR 嘅感受,如果用 HTC VIVE 嘅角度黎講佢一定係差過 HTC VIVE,但係都有 HTC VIVE 嘅 80% 嘅功力,畫面係唔差,但操作方面感覺係麻麻,好多遊戲都係拎個手掣玩就算,VR 只係視覺上嘅感受,好少遊戲真係會幾依賴動作方面。Sony VR  用 PS4 就玩到,VR 眼罩個價錢又唔貴,如果拎黎試玩下 VR 係唔錯嘅選擇。但如果有經濟能力黎講,個人傾向玩 HTC VIVE,始終真實度黎講 HTC VIVE 黎講係好玩過 Sony VR,因為HTC VIVE 嘅活動範圍相對黎講大過 Sony VR,Sony VR 都係依賴一個鏡頭黎運算手制嘅位置,相對 HTC VIVE 用上兩個感應器黎講 Sony VR 都有一定嘅距離,而且未必隻隻 Game 都可以大幅度嘅動作。Sony VR 可能會衰在感應器上面,但價錢上一分錢一分貨,3000幾蚊就可以玩到已經唔會投訴D咩野,但個人希望日後可以處理到感應器嘅問題,都希望推出更多嘅配件。

    立即加入Facebook 專頁,新聞/消息/優惠,最快知。

    01樓 ▲TOP 回列表頁
    熱門討論▼
  • 發表時間:2016-08-01 10:55 檢舉
    呢啲始終都係要靠GAME廠出力, HTC請唔請到大量廠商出GAME? 我估唔容易...
    PS長遠黎講實有優勢
    02樓 ▲TOP 回列表頁