▲單係鮮綠色機身，在日本都有五種手柄色的特別版供人訂購，但到港的水貨係最保守的黑色手柄版。
Pentax 部多色 DSLR K-x，已經推出了一段時間，王大文聽聞佢反應一直唔錯，尤其係少貨的深藍色同最多女仔鍾意的白色，更曾多次賣到斷貨。不過，唔少人話部機在日本反而賣得麻麻，就算有極具噱頭的 100 隻特別色，都唔算好搶手，所以水貨拆家想入特別版返香港賣，亦冇乜難度，事實近期旺角電腦中心有三間同屬一個老闆旗下的 DC 舖，就已經賣緊。
暫時呢批特別版只有鮮綠同彩藍兩隻比較大路的顏色，係跟 18-55mm 同 55-300mm 兩支黑色鏡頭的 Kit裝。其實呢套雙鏡 Kit 裝的日本售價，同香港行貨定價差唔多，折合港幣大約 $8,000，但而家水貨只賣 $6,080，可見日本方面跌價跌得好犀利，真係似唔多賣得。順帶一提，定價 $7,890 的雙鏡 Kit 裝行貨，現時市價雖然同樣插破 $7,000，但都守住 $6,000 尾的位置，仍比特別版水貨貴幾百。
▲彩藍色亦係 K-x 行貨冇出的顏色。雖然行貨都有鮮紅色，但由於特別，所以 DC 舖照入埋水貨。