IMC 印尼上網卡有兩種購買方式，可以喺網店購買後郵寄，又或者深水埗都有地方有賣。版主選擇咗後者，貪其即買即用，過程都好方便。包裝入面有三合一SIM卡，適合各種手機型號，另外都有 eSIM 選擇，適合支援 eSIM 功能嘅手機。開啟方法好簡單，插入卡後開啟數據漫遊，佢會自動連接當地網絡。根據官方資料顯示，呢張卡會使用 Telkomsel / Excelcom 網絡。
峇里島不定時 Speedtest 實測
版主在峇里島期間，特登不定時咁喺唔同地方進行多次 Speedtest 測試，發現唔同區域的網速有明顯差異，有時下載速度低至 30Mbps，但快起上來則可以去到 130Mbps，雖然呢張 SIM 卡係支持 4G 而唔係 5G，但呢個速度令我去到邊都相當夠用，至少我去咗 5 日，無試過去到咩地方係上唔到網，即使喺小米發佈會現場咁多人嘅情況下，都依然可以上到網，已經係好難得。
▲ POCO 發佈會現場都仲有 52.8 Mbps 的速度，不過有趣的是，呢張 SIM 就算喺印尼跑 Speedtest，都係顯示用 1010 / csl / Club Sim 網絡。而版主都同 IMC confirm 過，確實係用 csl 嘅漫遊資源。
日常使用體驗
實際使用方面，社交媒體與通訊軟件完全無問題，WhatsApp、Line、WeChat 等傳送文字、圖片同語音訊息都好流暢。雖然張卡唔支援傳統語音通話，但可以用通訊軟件嘅話音功能，版主試過用 WhatsApp 打電話返香港，通話質素都幾清晰，無明顯斷線或雜音。影片播放體驗都令人滿意，期間版主用一些 App 去睇香港的新聞，睇直播都可以順暢播放，整體體驗良好。頭 5GB 全速數據期間，完全無窒機問題，睇片、瀏覽網頁都好順暢。網頁瀏覽與電郵處理都無問題，Gmail 附件下載速度都算快，對於出差人士來講完全夠用。版主亦試過用手機分享熱點畀其他手機使用，速度都算穩定。
講到呢張 SIM 卡美中不足的是，佢無得打個電話或者用 App 去查自己用咗幾多 GB 數據，要用到 80% 佢先會有 SMS 提示，如果其他時間真係需要 check 自己用量，就需要 WhatsApp 客服去幫你查。雖然用完全速數據會限速至 128kbps，不過如果嫌太慢，都可以增值加數據。
小結
總括來講，IMC 呢張印尼上網卡以 $58 價錢來講算係交足功課，價格便宜又使用 Telkomsel 網絡，覆蓋廣泛，設定簡單，插卡即用，市區速度表現理想，而且有 24 小時客戶服務，特別適合預算有限、行程主要在市區嘅旅客。除咗印尼之外，IMC 仲會有其他國家地區選擇，網友又點睇呢張上網卡呢？會唔會考慮入手？留言話我知啦！按這裡有購買連結