Gemini 音樂生成實試：Lyria 3 有幾勁？
其實 Google 之前都有搞過音樂 AI，但今次 Gemini 內置嘅 Lyria 3 模型，喺體驗上真係提升咗好多。版主試玩過之後，總結咗 Lyria 3 嘅三大升級位：自動填詞，唔洗自己諗：以前玩 AI 作歌可能要自己寫一堆歌詞，依家只要畀個 Prompt (提示詞)，Lyria 3 就會根據你嘅要求自動幫你填詞。
更高嘅創作自由度：你可以好仔細咁控制首曲嘅風格 (Style)、人聲 (Vocals) 同埋節奏 (Tempo)。
曲風更複雜、更逼真：生成出嚟嘅音樂質素比起上一代有明顯進步，可以創作出更真實同埋音樂結構更複雜嘅樂曲。
▲ 只要喺 Gemini app 輸入簡單指令，就可以隨時生成專屬音樂。
兩大玩法實測：文字轉音樂 vs 相片轉音樂
版主實試咗兩種主要嘅玩法，發覺都相當有驚喜！玩法一：Text to track (文字轉音樂)
你可以直接描述你想要嘅曲風、心情甚至係一個笑話。官方示範咗輸入：「我想作首歌畀阿媽，懷念下細個一齊食家常便飯嘅快樂時光，想要有節奏感嘅 Afrobeat 非洲曲風」。Gemini 喺極短時間內就生咗一首合乎氣氛嘅音樂出嚟，用嚟過下癮或者氹屋企人開心真係一流。又或者「我想幫 eprice.com.hk 香港手機新聞網站，作首專屬主題曲，要輕鬆又洗腦。」，佢都可以生成到一首出嚟，不過缺點就係佢主要係普通話，如果格硬要佢轉廣東話，咬字會好奇怪。
玩法二：From photos and videos to track (相片 / 影片轉音樂)
呢個係版主覺得最好玩嘅功能！你可以直接 Upload 一張相或者一段片畀 Gemini。例如你可以 Upload 一張狗狗去行山嘅相，然後叫 Gemini：「用呢張相作一首關於我隻狗 Duncan 行山嘅歌」。Gemini 唔單止會分析張相嘅內容，仲會填埋合適嘅歌詞，成件事非常有 Feel！
值得一提嘅係，每首 30 秒嘅音樂，Gemini 都會搵另一個 AI 模型 Nano Banana 幫手生成一個專屬嘅唱片封面圖。完成之後，仲可以一鍵 Download 或者 Click 個 Share Link 開心 Share 畀朋友，玩味十足！
▲ 呢首就係實測生成嘅 30 秒歌曲，仲配埋 Nano Banana 生成嘅專屬封面圖，係咪好有誠意呢？
版權問題點解決？內置 SynthID 隱形水印
玩 AI 音樂，大家最擔心一定係版權問題。Google 今次都做得幾謹慎。首先，Lyria 3 嘅設計目的係為咗激發原創表達，而唔係用嚟模仿現有嘅歌手。如果你喺 Prompt 入面指名道姓要求模仿某位歌星，Gemini 只會將佢當作「廣泛嘅創作靈感」，生成一首風格或氣氛類似嘅歌，而唔會直接 Copy 佢把聲。另外，所有喺 Gemini app 生成嘅音樂，都會加入咗 SynthID 隱形水印。如果你懷疑某段音訊係咪 AI 整出嚟，只要 Upload 上 Gemini 問下佢，佢就會幫你 Check 下有無 SynthID，從而話畀你知段錄音係咪出自 Google AI。