設定網站通知

$26 養號神器！IMC Networks 派福利：免費轉台送 20GB 數據 + 600 分鐘

左定坤 (Cho Ting Kwan) 2026-02-06 18:26 | Csl
最近版主就留意到市場上多咗好多抵玩年卡，例如 Your Mobile、Lucky SIM，都有 3 年有效期嘅年卡，平均每個月 $4-5，就可以養號碼。而 IMC Networks 趁住新春推出咗個「馬」到功成大優惠，無論你想開個新號碼，定係想免費轉台「過冷河」養號，計返都係一個月 $5 唔使，雖然唔係三年卡，但都叫做有半年有效期，都可以用嚟養號碼。想知詳情，睇下文啦！

FB.jpeg

$26 超低價開新號！半年「養號神器」強勢回歸

好多網友之前成日問版主，有無啲平平哋嘅卡可以用來收發 SMS，又或者俾部 iPad 上網、做後備號碼等等，而家機會又嚟喇。IMC Networks 今次推出嘅開新號碼優惠，主打超低門檻，只需 $26 蚊，就可以開到一個新號碼。

呢 $26 蚊唔係淨係買張卡返嚟，而係已經包咗你 180 日，即係足足半年嘅使用期，裡面仲包含 20GB 本地數據同埋 600 分鐘本地通話。平均計返落嚟，一個月都唔使 $5 蚊，攞嚟做「養號神器」或者俾屋企對數據需求唔大嘅老人家小朋友用，真係抵到爛。

螢幕擷取畫面 2026-02-06 172847.png

轉台居然免費？送 20GB 數據 + 通話零成本玩半年

如果你手上已經有個號碼想轉台，又或者合約剛好到期想搵地方「過冷河」，今次 IMC Networks 呢個免費攜號轉台（MNP）優惠就更加唔可以錯過。今次佢哋趁馬年新春加推，只要你成功轉台過檔，佢哋就即刻送你一張實體卡，裡面規格同上面開新號一樣，同樣包咗 180 日 20GB 本地數據同 600 分鐘通話，重點係完全免費，真係零成本！

點樣拎？非常簡單，只要做齊三個步驟：填妥佢哋提供嘅 Google 表格、Like 埋佢哋 Facebook 專頁、再 upload 已讚好嘅截圖證明就得。提交資料後大約 1-2 個工作天就會有專人 WhatsApp 或電郵搵你搞轉台手續。不過記住，呢個優惠期只係去到 2026 年 2 月 28 日咋，想免費拎卡就要快手！

留意轉台時間及實名登記

最後都要溫馨提提大家幾點注意事項，雖然優惠好吸引，但都要留意返轉台一般最早要遞交資料後第 7 日先生效，如果本身用緊月費計劃，記得要預留時間喺合約完結前最少 1 日轉走。另外，收到 SIM 卡後，記得要上返 IMC Networks 網站做實名登記先用得。SIM 卡方面佢哋會用平郵寄出，如果心急想快啲收到，都可以選擇順豐到付。仲有一點係，呢個優惠默認係俾實體卡，如果你係想用 eSIM，就要留意返規定，需要先進行充值（唔計 SMS 同 IDD 充值），之後再俾 $5 手續費先可以申請轉做 eSIM。呢個馬年大優惠，大家又覺得抵唔抵呢？

最新新聞