誠哥好嘢！SoSIM 終於有得 MNP 攜號轉台！簡單 5 步攪掂

左定坤 (Cho Ting Kwan) 2021-05-20 17:12 | 3 香港

今時今日，我認為最抵玩嘅儲值卡，相信應該係誠哥嘅 SoSIM。月費平，$33，但又數據多，60GB，一般嚟講夠用，兼且又唔使簽約，簡直係慳家救星。然而，一直以嚟 SoSIM 呢張卡，最令我覺得失望嘅地方，係佢無得 MNP 攜號轉台，如果有埋 MNP，佢就真係無敵。好消息係，SoSIM 居然真係有得 MNP！啱啱推出咗，聽落幾唔錯，點先轉到台，下文話你知！



其實早應該估到，早前 SoSIM 增加屈臣氏購買渠道嘅同時，仲推出咗新版 SIM 兼有埋手機 App，畀人喺 App 度增值、管理服務計劃，其實亦係為推出 MNP 攜號轉台寫下伏筆。

而家只要到百佳或者屈臣氏，購買新版嘅 SoSIM，然後喺手機度打開 SoSIM App，用你新版 SoSIM 嘅電話號碼登入，就可以喺設定度選擇「攜號轉台」(如果你係用緊舊版嘅 SoSIM，則沒有「設定」嘅選項)。

要注意嘅係，現時 SoSIM 嘅「攜號轉台」功能，只係適用於儲值卡嘅攜號轉台，如果你本身係月費計劃客戶，唔好意思，麻煩你要做多一步，先 MNP 咗去儲值卡，例如 Lucky SIM，之後應該要畀半個月至一個月時間過一過冷河，然後先再 MNP 去 SoSIM。

MNP 攜號轉台五步曲

 

001: 登入 SoSIM App，按設定圖標。

002: 下方會見到「攜號轉台」選項。

003: 話你知有乜要注意，撳「確定」。

004: 輸入你要攜號轉台嘅儲值卡號碼。

005: 填寫現時網絡商以及生效日期資料，再影一影張儲值卡，填 ICCID 碼，「確定」。