又一 MVNO 公司現身？版主收風：堅料！低至 $78 有 30GB 本地 5G，抵？

左定坤 (Cho Ting Kwan) 2025-08-27 18:52 | 3 香港

平時間唔中都有網友會主動報料畀版主，今日有網友就 send 咗一個 Facebook Post，問我到底個 Post 係堅定係流，咁個 Facebook Page 就咁睇得 1 個 like，根本好似新開咁，覺得伏伏地都好正常，唔知會唔會係偷人個人資料嗰啲，覺得無理由咁鬼平，$78 就有 30GB 5G 數據。不過，版主問咗我啲 sales 朋友，確定咗個 Plan 係堅料。呢篇文章就同大家講下。

低至 $78 有 30GB 本地 5G，抵？

從網友 share 畀我嘅資料顯示，寫住「5G 本地及大灣區 2025 年 8 月特選優惠」，一共 show 咗有三個 Plan，一個係本地最抵 5G Plan，一個係本地高用量 5G Plan，一個則係中港澳共享 Plan，平均月費分別為 $78 30GB、$118 100GB 以及 $144 50GB，需要簽約 30 個月。不過，奇怪就奇怪在，個 Page 得 1 個人 Like，5 個人追蹤，似乎只係新開，但都有可能係有啲 Sales 自己開。

但重點係，版主問咗呢單嘢係堅料，佢係一間 MVNO 公司，都係租用 3HK 網絡，所以你會見到，佢成個 Plan 都同 3HK 本身個 Plan 差不多，只係價錢就再平一截。但間 MVNO 公司叫乜名，佢表示好似未改名，可能分分鐘連名都未必會改，就咁叫大灣區 XXXX 之類。先唔好理個名叫乜，有無名先，唔知網友又對呢幾個 Plan 有無興趣呢？留言討論下啦！