主題:解構一個香港 5G 網絡!SmarTone 5G 實地測試解說

ePrice HK
  • 發表時間:2019-03-28 12:31 收錄檢舉
    對於唔少網友來講,手機網絡可能簡單到,我係基站附近就收到訊號,有訊號就講到電話、上到網。不過,係 5G 網絡,由建網到實際應用都跟 3G / 4G 年代大大不同。最近,筆者有機會參予數碼通 (SmarTone) 係香港進行 5G 實地測試,與此同時,佢哋講解咗唔少測試與建設香港嘅 5G 網絡情況,我就試試跟大家分享一下。

    解構一個香港 5G 網絡!SmarTone 5G 實地測試解說
     

    數碼通嘅 5G 網絡是什樣

    以下部份,是給予對電訊網絡有興趣的網友觀看,好多 Point,仲好長。而我當然不是專家、學者或是工程人員,內容部份都是由 SmarTone 人員跟我解說,當然也有部份是我對 5G 嘅認識。SmarTone 是香港四大網絡商之一,剛剛從電訊管理局取得 28 頻段共 400MHz 頻寬作 5G 網絡之用,未來肯定有計劃在香港建立 5G 流動網絡。香港 5G 在技術及時間表上會係點?

    001:SmarTone 表明會在香港建立一個由 3.5 / 28 頻段組成的 5G 網絡,不會單一採用 28 頻段開網。

    002:上面提及剛取得 400MHz 頻寬是 28 頻段,學術點來說是 28GHz 頻段,想像大家用的 WiFi 是 5GHz 頻段,4G 最高的是 2.6GHz,28GHz 數字上是好大,代表的是更加高嘅頻段。電訊界叫作 mmWave (毫米波 Millimeter Wave) 又稱為「極高頻」。

    003:用 mmWave 毫米波 28 頻段有乜好處?因為夠闊,上網速度可以好快,有幾快?每秒 3Gbps 或以上,快過光纖上網。夠闊,代表可以同時容納好多人或物同時上網:同一個地區上萬計。留意我用了「人或物」,即係乜嘢都可以用流動網絡連上網。數碼通取了 400MHz 嘅 28 頻段有幾闊?比個參考大家:港鐵舊線多用 1800 頻段作 4G 上網, (數碼通以港鐵上網快為賣點,有機會再分享點解),因為 1800 頻段在港鐵舊線只有 10MHz 闊度。大家明白中間的分別未?

    004:政府給了數碼通 400MHz 頻寬是 28 頻段,為何不立即開 5G 網絡?28 頻段其實都有好多技術問題要克服。首先,手機訊號十分容易被干擾!下雨天可以把本來嘅覆蓋收細至一半。而一個發射站,以今次數碼通測試嘅位置,大約係三樓高度作計算,只能照顧肉眼見到約二百米嘅範圍。而 28 頻段訊號亦會受汽車、樓宇的分佈干擾。所以只能作小區覆蓋,放在要有極高上網速度需求嘅環境或極多人用嘅地方。所以數碼通不會單獨使用 28 頻段 5G 網絡。

    005:亦因為咁,SmarTone 及其他香港手機網絡商,等待政府公佈拍賣 3.5 頻段的 5G 頻譜,時間大約為今年,即 2019 年六月左右。3.5 頻段,即透過 3.5GHz 頻譜提供 5G 服務。數字上見到 3.5 比 28 為細,無線頻譜來講,是中頻段。預計每間網絡商,未來會投得 50MHz 或更多嘅 3.5 頻段,比起現在如 2.6 頻段嘅 4G 頻段的 20MHz 頻段闊好多,上網速度可以達 1Gbps 或更快。因為頻段較低,覆蓋有接近現時 4G 網絡的效果,很適合作為 5G 網絡嘅「底子」網絡。

    解構一個香港 5G 網絡!SmarTone 5G 實地測試解說

    006:SmarTone 已有 400MHz 嘅 28 頻段頻譜在手,亦打算參予年中嘅 3.5 頻段頻譜拍賣。成功的話,約 2020 年底才會推出商用嘅 5G 網絡,到時,此網絡主要會由 3.5 與 28 頻段混合而成。數碼通現時最希望是 3.5 頻段頻譜拍賣底價不要定得太貴,否則投資金額會更大,未必做到有效嘅商用模式。

    007:5G 網絡出現,不代表 4G / 3G 甚至 2G 網絡立即退場。以本人所知,香港及其他地區(除了內地)都會採用 NSA 方法 (Non Standalone 非獨立)。建立初期嘅 5G 網絡。即係會用回 4G 核心基建,而 5G 網絡極需要 4G 網絡輔助,如增強覆蓋與話音服務。SmarTone 表示,都要花上兩三年時間才能架建全港都有嘅覆蓋。

    008:之前講過,香港會有好大嘅 5G 覆蓋「結界」詳細可以睇番 ePrice 嘅文章講解呢個問題。SmarTone 表示,跟「結界」裡面衛星供應商,商討過不少技術方案。暫時來講,只有搬遷衛星發射站,才可以全面解決問題,這也不是幾年內做到嘅事。即係,喺「結界」裡面嘅朋友,5G 開網初期,應該都係無 5G 你用。
     

    SmarTone 5G 實地測試試什麼?

    解釋完一大輪香港 5G 會係 D 乜,其實各大網絡商都不停做緊測試,但係我覺得最接近真實網絡嘅,應該係 SmarTone 最近進行全港首個同步使用 3.5 及28 頻段嘅 5G 網絡實時測試。據知,呢次測試透過通訊事務管理局辦公室 (OFCA) 發出嘅准許證進行。由 Ericsson 提供嘅 3.5 與 28 頻段基站,安置喺一座位於觀塘的商廈三樓位置,面向下面的街道發射 5G 訊號。呢個測試,就係模擬 SmarTone 未來會係香港建設嘅 5G 網絡,用一架載著測試儀器的貨車,用來測試接收效果及連線速度。測試車係附近的街道遊走,看看係不同位置接收情況。據知,呢間測試車已試了一段日子,包括下雨天、晴天、繁忙時段及非繁忙時段。結果係點?睇相吧?

    解構一個香港 5G 網絡!SmarTone 5G 實地測試解說
    ▲ 這架就係 SmarTone 嘅 5G 測試貨車,用來接收 5G 訊號。

    解構一個香港 5G 網絡!SmarTone 5G 實地測試解說
    ▲ 裡面安裝了 Ericsson 的接收儀器,收了訊號後,再測量上網速度。

    解構一個香港 5G 網絡!SmarTone 5G 實地測試解說
    ▲ 5G 發射站安裝喺一座數碼通位於觀塘的商廈。比較高及細少的一個,負責輸出 28GHz 訊號,下面比較大的一個是負責輸出 3.5GHz  訊號。而兩個發射站都一樣指向創業街


    解構一個香港 5G 網絡!SmarTone 5G 實地測試解說
    ▲ SmarTone 的測試車圍住創業街一帶接收測試訊號。圖中,紅色範圍是一個 3.5GHz 基站,可覆蓋的地方。而藍色部份,就係 28GHz 基站可覆蓋嘅地方。末來 SmarTone  在繁忙地區,主要會用 3.5 及 28GHz 兩個頻段去做 5G 網。由圖中顯示,大家好清楚睇得出 3.5 頻段才做到一個基站的大範圍覆蓋。SmarTone 表示,他們得知是只要開啟 Massive MIMO ,一個 3.5 頻段基站係可以做到大約等於 2100 及 2600 頻段的戶外覆蓋。

    解構一個香港 5G 網絡!SmarTone 5G 實地測試解說
    ▲ 這張圖顯示了 28 頻段在天氣差及多人地方,訊號範圍會愛影響。

    解構一個香港 5G 網絡!SmarTone 5G 實地測試解說
    ▲ 今次測試,試到 28GHz 頻段可達  3Gbps 速度;而 3.5GHz 頻段可達 1.28Gbps 的速度。
     

    5G 應用示範:低時延的重要性

    除了實地戶外測試,SmarTone 與 Ericsson 共同展示 5G 應用,今次測試不單是針對 5G 帶來嘅高速連線環境,更著「低時延」重要性,「低時延」即係連線嘅網絡反應,以人來做比喻嘅話,即係有人叫你做嘢,你可唔可以即時畀到反應人。「低時延」代表反應越快,令到遙距控制變得有可能,再配合其他新科技如擴增境 (AR)、混合實境(MR)、人工智能(AI)等令我可以具體知道吓,未來 5G 世界係點樣。以下就是示範嘅重點解說。

    001:AR 沙箱。沙箱裡嘅沙係射燈之下,有不同的顏色模擬山勢高低及水流向。只要我哋用鏟改變沙堆形態,等高度及水流向亦即時改變。原來沙箱上面,有一個接收器即時感應沙堆變化,再透過 5G 網絡作即時雲端運算,再指令顏色變化。5G 低時延及高數據速度,再配合流動邊
    緣運算及 AI,令整個過程也有即時的感覺。

    002:包剪揼鬥快遊戲。呢個會玩包剪揼嘅機械人,透過 5G 網絡的低時延,即以及 AI 技術,即時回應你的出拳。同場有一隻手是用 4G 網絡,一睇之下,反應慢好多!

    003:機械車比拼。跟包剪揼鬥快都係一樣,透過 5G 低時延網絡及 AI  技術操控模型車會順 D 定係 4G 呢?估到吧!

    004:簽名機械臂。5G 低時延及  AI 技術亦可以做到幾乎同步嘅簽名。今日 Demo 是簽名,當技術成熟,用在手術室,用 5G 網絡遙控做手術也可以呀!

    005:MR 實時睇樓。5G 網絡不少得是速度!上網比現時 4.5G 網絡都要快,可以做到實時 VR 影像傳送,再配合 AR 技術,可以做到混合實境。好似呢個 Demo 咁,你帶了 VR 眼鏡,就可以預覽快將動工嘅建築物嘅外表會係點,就好似試衫咁,覺得設計不合心意,也可以立即再修改啦!
       
     
    ▲ 再睇片!

    資料由客戶提供
    快加入會員賺 EP!累積點數、免費換優質商品

    立即加入Facebook 專頁,新聞/消息/優惠,最快知。

    01樓 ▲TOP 回列表頁