csl. 與 3 香港 FUP 政策大改
其實都實行了一個月，因為儲值卡沒有合約，所以 csl. 與 3 香港都靜靜雞係網站修改了儲值卡上網 FUP （Fair Usage Policy) 公平使用條款，做法各有各衰。csl. 劃一把新品牌 csl. 舊版本 One2Free ，PCCW 嘅儲值卡，都改為每月最高 6GB 公平使用量。其實以前都有類似條款，更只有 5GB，但列明 5GB 後只會實施網絡先後次序，不會限速。而新 FUP 條款是講明用爆 6GB 後限速。之前版主介紹過嘅 One2Free $160 卡，什麼 Hemat、Sikat、港澳遊等等也齊受影響。簡單來說，一張新舊 CSL、PCCW、One2Free 旗下儲值卡，一張卡，一個月只能用 6GB。記住「一張卡，一個月呢個 Point」，因為之後介紹高用量嘅玩法，都係係咁換卡先 OK。
3 香港仲妙，幾個月不停係咁轉條款，由好嚴格爆用量限速，到返回舊年代，佢幾時限你都得，但過一兩日又會回復舊速。不過，最新指令都係用爆每月用量即限速。版主 Keith 之前介紹過嘅 3G 數據卡，人稱核武卡、Network III 4G 上網卡等等，都改為一個月 3GB 用量，用爆即限。
高用量儲值卡上網選擇
▲ 二百蚊有找，4G 網絡用 28 日有 24GB: 呢張真係最後樂土來。 識玩嘅，就要不停開卡，不停轉卡。呢張面值 $78 嘅 One2Free 儲值卡，可以開到 7 日 7Mbps 嘅 4G LTE 上網計劃，用嘅係 CSL 網絡。由於 csl 新的 FUP 政策，呢七日只用到 6GB 用量。呢張卡大約賣 $45 一張，貨源無多。七日 $45，廿八日就係 $180，四張卡即 24GB 用量。$180 28日有 24GB 4G LTE 7Mbps 速度，夠用嗎？二百蚊樓下，7Mbps 下傳，5Mbps 上傳嘅速度，係 4G 網絡下會好穩定，24GB 用量，駁電腦上網，唔係 BT 應夠用。呢張卡以 MicroSIM 為主，鮮有 Nano SIM。呢張卡貨量極少，入貨要快。
▲ 無限上網唯一選擇： 中國移動香港 3G / 4G 儲值卡。要用 4G LTE 無限上網，暫時只有呢張。不過，我講嘅係 4G 限速。限速會快嗎？版主之前已介紹過，去到 700kbps 支援手機甚至 Pocket WiFi 與 Tethering 分享數據 (對，跟封面寫的不同，寫是限 384kbps 用 3G，但實際唔係，見測試稿)。原價 $80，要抵玩的，去深水埗桂林街買卡，最平 $48 一張。此卡做緊 HK $30 包十日 4G Lite 限速上網 ，由於首十日是送的，一張卡 $80 面值用到 30 日。平均 $48 包 30 日 4G Lite 平過上台。呢張卡有 nano SIM 選擇。呢張卡貨量充足，但有加價之勢版主最平 $48 入到貨，但大部份 SIM 檔賣 $55 。CMHK 網站賣 $65，包送貨，若果你住得唔近深水埗，上官網買也是不錯選擇。
▲ 上面講嘅開卡送首十日 3G Lite 無限上網，推廣已改至 2015 年 12 月 31 日。
▲ 一個月 4G 網絡 5GB 用量 ＋1800 本地分鐘 : 一個月 5GB 4G LTE 用量夠用嗎？新版中國移動香港 4G 數據體驗卡，賣價 $150，包五百蚊面值，即係三十日 5GB 上網。注意新版過了 5GB 用量後即停，而 4G LTE 速度亦被限是 7.2Mbps，開卡即送 1800 分鐘係其賣點。呢張卡有 nano SIM 選擇。貨量充足。
▲ 百五蚊三星期 4G 7.2Mbps 速度有 6GB : 以前版主介紹過嘅 $160 One2Free 卡。之前以講過，呢張卡四月底已到期，所以全部被卡檔開啟。現在呢張卡賣 $150，包三星期上網。同樣都係 CSL 4G LTE，7Mbps 速度。一張卡，最多用 6GB，即係 $150 包 21 日 6GB 上網，比起中國移動香港體驗卡更貴，因為少了七日，但好處係有 nano SIM 選擇。呢張卡進入倒數，快無貨。
▲ $150 / 4G 不限速 3GB 用量 : 版主，咪玩野，上面你講嘅 4G LTE 儲值卡，全部都有限速，最快只有 7Mbps，咁用 3G 都無分別？都有架，4G 網絡嘅限速，係真材實料比到你，如 CMHK 嘅 3G / 4G 儲值卡，好穩定給你 600-800kbps 速度。上述講嘅 7Mbps 限速卡，也是 5-7Mbps 左右。對比係 3G 網絡，由幾百 kbps 到 20Mbps 都可以，用 4G 網絡係好嘅。咁，有無真 4G 速度? 有的，但價錢貴好多。好似呢張 3 香港嘅 4G LTE 網絡 3GB 用量卡，深水埗最平 $180，用爆無得用，地獄都無得落。呢張卡好處係送你一個月 WiFi 上網。想提一提，3HK 嘅 WiFi 供應商 Y5Zone 今年唔再係星巴克舖 WiFi 網，連埋 Pacific Coffee，兩大大型連鎖 Coffee Shop 都無得用 3 WiFi ，係令人好頭痛。呢張卡無限速，有 nano SIM 選擇。
▲ 呢張咪你上次介紹過 Network III 嘅 4G 儲值卡? 係喎，面值 $200，賣價 $180。同樣做到每月 3GB 容量4G 速度，但只去到 42Mbps，過左 3GB 用量唔會停止數據服務，只係會打入 128kbps 地獄速度。另外，佢雖然寫著 $188 / 30 日無限上網，但之前版主試過，過左 3GB 即限，好嚴格。不過，呢張卡好處係有其他 Package 揀，例如 $78 包一個月 2GB 用量，唔可以話好平，但比較適合中低用量，又想要高速感受嘅網友。
▲ ＄70 一個月 3G 42Mbps 速度有 12GB : 上面幾張先唔理係咪速度，都係用上 4G LTE 網絡。呢張用是用 3G 的，用的是 PCCW 網絡。面值 $78，但深水埗賣緊 $35 一張。係十月底前，呢 $78 可以開通兩次 7 日 3GB 用量 (買一送一) 嘅優惠。以每張卡嘅賣價計算，即係 $35 就有 14 日共 6GB 用量上網，每七日 3GB 計算。每 14 日換卡，即係每月約 $70 ，係 28 日內面，有 12GB 用量上網啦。 卡面寫上最高支援 42Mbps，但 PCCW 3G 網絡一直也不穩定，你預大約 1MB - 3MB 左右速度，偶有升至 7MBps 以上就是了。呢張卡另一好處係送 csl. WiFi 任用。不過，儲值卡 login 程序都好煩，不支援 Auto Connect，你當係電腦使用就好。呢張卡以 MicroSIM 為主，鮮有 Nano SIM。PCCW 不是跟 CSL 合拼咩？網絡是否一樣？係呢一刻仲未完全係，尤其 3G 網絡，一般而言 PCCW 3G 網絡，上網 Load 空氣極慢嘅情況，比起 CSL 網絡嚴重好多。大家要留意一下。
▲ $16.5 一日，真 4G 無限上網：數碼通呢張卡，一直唔太起眼，因為收費都好貴，每日 $24，4G 正速無限上網。但當 csl、3HK 都改變條款，呢張卡成為最後無限上網樂土。雖然佢都有每月 5GB 公平條款，但實際佢跟上台 Plan 一樣，用爆 5GB 只係調整網絡使用優先次序，不會限速。所以好合一些網友如 Weekend 睇波，突然要大量檔案要下載之用。不過咁，呢張卡原價都好貴，$48 原價，一開卡即扣 $2.5，只開用到一天無限上網。不過，係深水埗，呢張卡就平好多，版主見過最平 $100 有三張面值 $48 嘅卡，開卡即送多 $8 面值 (暫時仲有)，送多八蚊，一張卡就用到兩日 Pass 了。計一計，即係 $33 用到 2 日真無限上網，平均 $16.5 一日，要無限上網，一日起，兩日止，頂住先。呢張卡有大量貨，但要揀最平，要行多幾間 SIM 檔睇睇。此外，記得若果要做 tethering 或供平板上網之用，APN 要改為 internet，手機上網嘅 APN 為 SmarTone。以 MicroSIM 為主。
點樣買
版主成日教人去買卡，咁點樣買？首先要聲明一點，版主唔識深水埗卡檔任何一個人，亦唔存在我幫佢地推銷。版主自己都有買卡用，全部真金白銀俾錢買。與此同時，網上個別聲稱幫人安排轉台 MNP，比 SIM 檔出價更平嘅師兄，我都係一個都唔識。佢有佢介紹，我有我分享。正如其他網友佢可以係 ePrice 貼文，呢到好歡迎相關師兄係 ePrice 貼文分享心得，唔識點 Post? 係 Facebook、會員 Send 個 PM 問我就得。
言歸正傳：去深水埗 SIM 卡，只要你係港鐵深水埗站 C2 出口，一出直望就係鴨寮街公厠。直向那條街就是桂林街。主要 SIM 檔，會在桂林街排檔兩側，包括過埋汝洲街馬路嘅兩排排檔，而鴨寮街兩側亦有幾間的。間間 SIM 檔賣價不同，要買得最平，最好行多幾間，自己格價。
