Black Friday 香港人掃貨福音：Amazon 推免運費送香港

左定坤 (Cho Ting Kwan) 2019-11-15 17:45 | 網絡消息

以前雙十一，就算係香港人都會好熱衷於淘寶，始終有平嘢，無理由唔買吧? 但今年就唔同，因為受到政治因素影響，大家對於雙十一促銷似乎興致不大。而想執平貨，或者會考慮黑色星期五 (Black Friday) 嘅促銷。幾時係 Black Friday？今年嘅 Black Friday 就係 11 月 29 日，相信好多網友都會考慮上 Amazon 睇下有無平價貨品，而好消息係，今年 Amazon 竟然有得免費送貨至香港！唔使再四圍搵代購公司，正！但，有咩條件？內文話你知！



雖然 11 月 29 日先係 Black Friday 正日，不過其實唔少美國網店如 Amazon，已經陸續推出一些 Black Friday 嘅促銷優惠。而今年 Amazon 更推出新服務，就係可以免費送貨至香港。根據 Amazon 官網指出，只要購買一或多項符合要求的商品，並且總訂單價超過 $49 美元時，即可免費送貨至香港。

「符合要求的商品」，即係點？點先知件商品係唔係符合要求呢？而又點樣先可以免運費呢？Amazon 就教大家四步曲：

1. 將送貨地址設定為香港
2. 符合要求並由 Amazon 運送的商品，價格旁會顯示「免費送貨至香港」

例如如果我想買呢個 Oculus VR 頭戴，價錢位置會顯示「無進口手續費押金且免費送貨至香港」。

3. 檢視購物車看看訂單能否享有免運優惠
4. 如果訂單符合要求，結帳時將會預先選擇「免費 AmazonGlobal 標準配送」



以往我哋 Amazon 買嘢，好多時都要搵一啲代購公司幫手，例如我哋以前成日介紹嘅 He_Shop，但而家 Amazon 開放免費送貨至香港，咁成件事就簡單咗，又唔使額外畀運費集運公司。網友又有無睇啱 Amazon 有乜筍買產品呢？留言討論下啦！